МАХН-ын ерөнхий нарийн бичгийн дарга Г.Шийлэгдамба тэргүүтэй тус намын нарийн бичгийн дарга нар өнөөдөр төв байрандаа сэтгүүлчдэд мэдээлэл хийлээ. Энэ үеэр тэд  “МАХН Засгийн газраас гарах эсэх асуудлыг ирэх долоо хоногт зарлагдах МАХН-МҮАН-ын “Шударга ёс” эвслийн Удирдах зөвлөлийн хуралдаанаас эцэслэн шийднэ” гэсэн мэдээллийг өглөө.

МАХН-ын удирдлагуудын зүгээс дээрх асуудлыг ойрын хугацаанд шийдвэрлэх шаардлагатай байна гэдэг хүсэлтийг МҮАН-д тавьчихаад байгаа аж. Албан бичгээр мөн асуудлаа хүргүүлсэн. Хоёр тал энэ талаар ярилцаад ямар ч байсан ирэх долоо хоногт Удирдах зөвлөлөө хуралдуулъя гэсэн шийдэлд хүрчээ.

МАХН-МҮАН-ын хамтарсан Удирдах зөвлөл нь 23 хүний бүрэлдэхүүнтэй, үүнээс найм нь МҮАН-ын гишүүд байдаг бол 15 нь МАХН-ын гишүүдээс бүрддэг юм.

Мөн МАХН-ын Гүйцэтгэх товчооны хурал өчигдөр орой болж, орон нутгийн сонгуульд нэр дэвшин ИТХ-ын төлөөлөгчөөр сонгогдсон гишүүдээ Улаанбаатар хотноо цуглуулж, хоёр өдрийн турш хуралдах шийдвэрийг гаргасан байна. Энэхүү хуралдаан арванхоёрдугаар сарын 16-17-ний өдрүүдэд болох аж. Мөн дараа нь МАХН-ын удирдлагууд орон нутагт ажиллах аж. Орон нутагт ирж ажиллах хүсэлтийг намынх нь гишүүд хүсч байгаа төдийгүй олон нийтийн зүгээс ч мөн ирүүлсэн гэлээ.