УИХ-ын Тамгын газраас УИХ-ын үйл ажиллагааг олон нийтэд нээлттэй болгох зорилгоор хэд, хэдэн ажлыг хийсэн нь эхнээсээ ажил хэрэг болсон байна. Тухайлбал, УИХ-ын чуулганы нэгдсэн хуралдааныг Монголын Үндэсний олон нийтийн телевизийн 2 дугаар суваг, Юнивишн кабелийн суваг, онлайнаар шууд дамжуулан орон даяар үзэх боломжтой болгожээ. Энэ ажил өнөөдрөөс эхэлж, УИХ-ын чуулганыг амжилттай цацаж эхэлсэн байна. Өмнө нь чуулганы хуралдааныг Улаанбаатар хотын хэрэглэгчид зөвхөн “Сансар” кабелийн телевизээр үздэг байсан юм. Харин дээрх боломж нөхцлийг бий болгосноор хөдөөгийн малчид УИХ-ын үйл ажиллагааг шууд хүлээн авах боломж ийн нээлттэй болжээ.

Мөн “Төрийн мэдээлэл” эмхтгэлийг цахим хэлбэрт шилжүүлснээр “ТМ эмхтгэл” нэртэй IPAD, IPONE програм болон open.parliament.mn вэб сайтаас иргэд олон нийт ямар ч үед мэдээллийг түргэн шуурхай хүлээн авах боломжтой болжээ. Шинэ он гарангуут дээрх эмхтгэлийг андройд хувилбараар мөн гаргаж олон нийтийн хүртээл болгох аж.