Английн зохиолч, яруу найрагч Жон Толкины 1937 онд бичсэн ижил нэртэй зохиолоос сэдэвлэн бүтээсэн “The Hobbit” кино өчигдөр Лондонд нээлтээ хийжээ. “The Hobbit” киноны нээлтийн ногоон хивсний ёслолд Кейт Бланчетт, Иэн Маккеллен, Мартин Фримен, Кен Скотт зэрэг нэрт жүжигчид  болон бусад кино багийнхан оролцсон байна. Мөн киноны нээлтийн ёслолд жүжигчид, шүтэн бишрэгчдээс гадна Лондонгийн олимпийн алтан медальт Грег Разерфорд, дуучин Ник Кейв болон Кембрижийн гүн, хунтайж Уильям нар хүрэлцэн иржээ. Гэхдээ гүнгийн хөл хүнд гэргий Кейт Миддлтон эрүүл мэндийн шалтгаанаар киноны нээлтэд оролцож чадаагүй байна. Ногоон хивсний ёслолд Австралийн жүжигчин Кейт Бланчетт газар шүргэсэн урттай, нуруу ил гарсан загвартай, цасан цагаан өнгийн даашинзаар гангарсан нь яахын аргагүй олны харааг булаажээ. Түүнчлэн “The Hobbit” киноны нээлтийн үеэр сюрприз болсон өөр нэг зүйл нь нэгэн залуугийн романтик гэрлэх санал байсан гэнэ. Шүтэн бишрэгч залуу киноны нээлтийн ногоон хивсэн дээр сөхөрч суугаад найз бүсгүйдээ хуримын санал тавьж олныг гайхшруулсан аж. Шинэ Зеландын найруулагч Петер Жексоны найруулсан “The Hobbit” кино өнгөрсөн сарын 28-нд Шинэ Зеландад эхний нээлтээ хийжээ.