Ази тивийн дөрвөн удаагийн аварга, олон улсын их мастер Д.Эрдэнэбилэг өмнөд хөршийн нийслэл Бээжин хотноо “World Mind Games” буюу дэлхийн оюун ухааны их наадамд оролцож байна. Шатар, даам, го даам, бриж гэсэн оюуны спортын төрлөөр зохиогдож буй тус  наадамд дэлхийн 32 орны 152 тамирчин оролцож буй. Д.Эрдэнэбилэгийн тухайд 100 буудалт даамын төрөлд оюун ухаанаа уралдуулж байгаа юм. Мөн Азийн даамын холбооны ерөнхийлөгч Ч.Бат-Эрдэнэ хүндэт зочноор оролцож байна.

100 буудалт даамын төрөлд шилдэг 16 даамчин оролцож байгаа. Д.Эрдэнэбилэгийн хувьд блиц төрлийн тоглолтын гараагаа тааруухан эхлүүлсэн ч дэлхийн аварга Г.Валнеристай хайнцаж, улмаар 10 дахь тавилдаа дэлхийн 10 удаагийн аварга, даамын домог болсон тамирчин А.Чижовыг хожиж, шуугиан дэгдээгээд байна.

Д.Эрдэнэбилэг нь өнгөрсөн наймдугаар сард Францын Липлей хотноо болсон оюун ухааны спортын II олимпиадын үеэр 100 буудалт даамын Азийн шилдэг тамирчнаар тодорч, дээрх наадамд оролцох эрхээ авсан юм.

Оюун ухааны наадам энэ сарын 19-нд өндөрлөнө.

НЭМЭЛТ (16:25 цаг):

Өнөөдөр үндсэн тэмцээн эхэлсэн бөгөөд шилдэг 16 даамчин дөрвөн хэсэгт хуваагдсанаас ОУИМ Д.Эрдэнэбилэг Латви, Герман, Беларусын их мастеруудтай нэг хэсэгт таарсан байна. Д.Эрдэнэбилэгийн хувьд өнөөдөр Латвийн их мастер, дэлхийн аварга Г.Валнерис оноолт таарч 8:4-аар ялалт байгуулав. Тэрбээр маргааш Германы их мастертай тоглоно.

Ч.БОЛОР