Азийн хөлбөмбөгийн холбооны 2014 оны “Challenge Cup” тэмцээний сугалаа Малайзын нийслэл Куала Лумпур хотноо болж, Монголын хөлбөмбөгийн шигшээ баг тэмцээний “С” группт Лаос, Афганистан болон Шри-Ланка улсын багуудтай өрсөлдөхөөр боллоо. Тэмцээний сонгон шалгаруулалтад 20 орны баг өрсөлдөх бөгөөд дөрөв, дөрвөөр таван хэсэгт хуваагдан тоглох юм. Тэмцээний дүрмийн дагуу хэсгээ тэргүүлсэн таван баг дээр хэсэгтээ хоёрт бичигдсэн багуудаас хамгийн сайн үзүүлэлттэй хоёр баг нэмэгдэж, дээр нь 2014 оны “Challenge Cup” тэмцээний зохион байгуулагч Мальдив гээд нийт найман баг аваргын төлөө өрсөлдөнө.

Монголын шигшээ багийн тухайд анх 2010 оны тэмцээнд оролцож байсан бөгөөд ийнхүү гурав дахь удаагаа хүч сорих гэж байна. Анх удаа оролцохдоо Макаогийн талбайд 2:0-ээр хожигдож, дараа нь нутагтаа хийсэн хариу тоглолтод 3:1 харьцаатай хожиж байлаа. Дараа нь 2012 онд урьдчилсан шатанд Филиппиний багтай тоглож, эхний тоглолтод 2:0 харьцаатай ялагдал хүлээж, Улаанбаатар хотноо хийсэн хариу тоглолтод 2:1-ээр өрсөлдөгчөө хожиж байсан юм.

Харин энэ удаад “С” хэсгийн тоглолтууд ирэх оны гуравдугаар сард Лаос улсад болох бөгөөд Монголын шигшээ баг гуравдугаар сарын 2-нд Лаостой, 4-нд Афганистантай, 6-нд Шри-Ланка улсын багтай тус тус тоглох ажээ. Монголын шигшээ баг өмнө нь 2001 онд Азийн аварга шалгаруулах тэмцээний урьдчилсан шатанд БНСУ-ын Сөүл хотноо Лаосын багтай тоглож, 2:1 харьцаатай хожигдож байжээ. Харин бусад багуудтай өмнө нь таарч тоглосон удаа үгүй аж.

“Challenge Cup-2014” тэмцээний сугалааг танилцуулъя.

“А” хэсэг: Мьянмар, Энэтхэг, Тайвань, Гуам
“В” хэсэг: Киргизстан, Тажикистан, Пакистан, Макао
“С” хэсэг: Лаос, Афганистан, Шри-Ланка, Монгол
“D” хэсэг: Непал, Палестин, Бангладеш, Хойд Мариани
“Е” хэсэг: Филиппин, Туркменистан, Камбож, Бруней

Дашрамд сануулахад, “Challenge Cup-2014” тэмцээний аварга баг 2015 оны Азийн хөлбөмбөгийн аварга шалгаруулах тэмцээнд оролцох эрхээ өвөртлөх билээ.