УИХ-ын гишүүн Ж.Батзандан өнөөдөр Шадар сайд Д.Тэрбишдагвыг албан тушаалаасаа огцрохыг шаардаж, мэдэгдэл хүргүүлээд байна. Тэрээр “МАХН-ын дэд дарга, УИХ-ын гишүүн Д.Тэрбишдагва нь Шадар сайдын ажлаа гүйцэтгэж чадахгүй байна, тэр тусмаа Онцгой байдлын алба ажиллаж чадахгүй, монгол хүний амь нас хохирч буй нь түүний үйл ажиллагаатай шууд холбоотой” хэмээн үзэж буй аж. Шадар сайдын эрхлэх асуудлын хүрээнд Онцгой байдлын ерөнхий газар харьяалагддаг.
"Эх хүү хоёр голд урсан сураггүй болоод өнөөдөр 38 хоночихоод байхад ямар ч арга хэмжээ авахгүй байгаа нь Шадар сайд өөрөө сайн дураараа албан тушаалаасаа огцрох хангалттай үндэслэл. Монгол иргэдийнхээ амь насыг аврах талаар юу ч хийхгүй байж, Н.Энхбаяр даргыгаа аврах гэж зүтгэж байдаг ийм Шадар сайд цаашид ажиллах ёсзүйн эрхгүй" гэж үзэж байгаагаа илэрхийллээ.
Хэрвээ УИХ-ын гишүүн Ж.Батзандангийн тавьж байгаа дээрх шаардлагыг Шадар сайд Д.Тэрбишдагва хүлээж авч огцрохгүй бол эл асуудлыг УИХ-ын төвшинд тавьж хэлэлцүүлэх болно хэмээн тэрээр мэдэгдлээ.