Монголын Үндэсний олимпийн хорооны чуулган тов ёсоор энэ сарын 19-нд болно. Соёл, спорт, аялал жуулчлалын сайд энэ талаар мэдээлэлгүй, албан ёсны мэдээлэл хүлээн аваагүй тул Олимпийн чуулганыг хойшлуулах талаар ССАЖЯ-наас мэдээлэл хийж байсан юм. Гэвч Олимпийн чуулганыг товлосон ёсоор ирэх долоо хоногийн лхагва гаригт хийх тухай МҮОХ-ноос мэдээлэв.

МҮОХ-ны дүрмийн дагуу Монголд олимпийн хөдөлгөөнийг удирдах дээд байгууллага нь Олимпийн чуулганы товыг хурал эхлэхээс гурван сарын өмнө зарлах ёстой. Ингээд өнгөрсөн есдүгээр сарын 14-нд болсон гишүүдийн хурлаас Олимпийн чуулганыг товложээ.

Чуулганаар МҮОХ-ны ерөнхийлөгч, гүйцэтгэх зөвлөлийн гишүүд болон хянан шалгах зөвлөлийг сонгоно. МҮОХ-ны Ерөнхийлөгчийн сонгуульд одоогийн тэргүүн Д.Загдсүрэнгээс гадна МҮОХ-ны тэргүүн дэд ерөнхийлөгч, Олон улсын оюутны спортын холбооны ерөнхий санхүүч, МОСХ-ны ерөнхийлөгч Д.Баясгалан, Монгол Улсын ерөнхий прокурор, МЖБХ-ны тэргүүн дэд ерөнхийлөгч Д.Дорлигжав нар өрсөлдөхөөр болжээ.

Чуулганд МҮОХ-ны гишүүд, спортын холбоо бүрээс тус бүр нэг төлөөлөгч оролцоно. Монголын Үндэсний Олимпийн Хорооны гишүүн гэдэгт спортын холбоодын төлөөлөл тус бүр нэг хүн, ОУОХ-ны гишүүн, хүндэт гишүүн, сүүлийн гурван удаагийн олимпийн наадамд оролцсон тамирчдын төлөөлөгч хоёр хүн, олимпийн наадмын медальт тамирчдын төлөөлөгч хоёр хүн тус тус багтдаг ажээ.