УИХ-ын Байгаль орчин, хүнс хөдөө аж ахуйн байнгын хорооны хуралдаан болж, Хүнсний тухай хуулийн төслийн шинэчилсэн найруулга хийгээд түүнтэй хамт өргөн мэдүүлэгдсэн хуулийн төслийн эцсийн найруулгыг хийж, дуусган, УИХ-ын чуулганы нэгдсэн хуралдаанд оруулахаар болж тогтлоо.

Эцсийн найруулгыг хийхдээ зарчмын зөрүүтэй саналын томъёоллоор санал хураалгасан юм. Тухайлбал, төсөлд “Хүнсний бүтээгдэхүүнийг баяжуулах” хэмээн заасан байсныг “Баяжуулан тохируулах” гэж нэмж оруулах нь зүйтэй хэмээн гишүүд үзлээ. Энэ нь хүнсний бүтээгдэхүүнийг баяжуулахаас гадна зарим нэг нэмэлт бүтээгдэхүүнийг тохируулах шаардлага үүсдэг тул түүнд нийцүүлэх нь зохистой хэмээн үзсэн юм.