Өнгөрч буй амралтын өдрүүдэд дэлхийн тэргүүн лигүүдийн ээлжит тойргийн тоглолтууд болж өнгөрлөө. Английн прьемер лигийн 16 дугаар тойргийн тоглолтын хүрээнд шилдэг тоглолтууд болж өнгөрсөн юм. Юуны өмнө Манчестерийн дербиг дурьдах хэрэгтэй. Ла Лигийн тухайд Герд Мюллерийн амжилтыг эвдсэн Месси, нэг тоглолтод таван гоол оруулсан Фалкао, Бундеслигийн хувьд Баейрны ялалт, Вольфсбургийн гайхалтай хожил, Сери А-гийн тухайд АЦ Миланы гайхалтай давшилт өнгөрсөн амралтын өдрийг чимсэн юм.

Английн прьемер лигийн өнгөрсөн тойргийн тоглолт сонирхолтой болж өнгөрлөө. Товчилбол Манчестерийн дерби. Сүүлийн хоёр жилийн хугацаанд энэ дерби ач холбогдол, өрсөлдөөнийхөө чанараар бусад жилүүдээс илүү сонирхолтой болсон. Харин өнгөрсөн тойрогт таарч тоглосон хоёр багийн тоглолтын үеэр Манчестер Ситигийн хөгжөөн дэмжигчийн шидсэн зоос асуудал тарьж дөнгөв. Өрсөлдөөн тоглолтын эцсийн цэгийг Юнайтедын Роби Ван Перси хаалттай цохилтоос тавьсан юм. Харин Рафаел Бенитез шинэ багтайгаа анхны ялалтаа авлаа. Энэ улирлыг гайхалтай эхлүүлсэн Вест Бромвич энэ тойрогт Арсеналтай таарч 2:0-ийн харьцаатай хожигдож лигийн зургадугаар байрт бичигдэж эхэллээ. Улирал эхэлснээс хойш ялалт гээчийг амсаагүй яваа Күинс Парк Рейнжерс энэ тойрогт ч мөн ялалт байгуулж чадсангүй. Тэд Виган Атлетиктай 2:2-ийн харьцаатай тэнцэж оноогоо хувааж авахаар болсон юм.

Манчестер хотын хоёр баг Монголын цагаар өчигдөр шөнө 164 дахь дерби тоглолтоо хийлээ. Хэрвээ энэ тоглолтод Юнайтед ялалт байгуулбал 6 оноогоор тасрах байсан, Сити ялбал онооны тасралтыг цөөхөн хэвээр байлгах байсан. Тоглолтын эхний үед улаан чөтгөрүүд илүү байсан. Уулгалсан довтолгооныхоо хүчинд тэд 16, 29 дэх минутад Вейн Рүүни дубль хийсэн юм. Багийн бараг ихэнх гоолд шинэ цэрэг Ван Персигийн хувь нэмэр байсан гэдгийг тэмдэглэх хэрэгтэй. Харин тоглолтын хоёрдугаар хагаст Ситичүүд гайхалтай эргэлт хийж 60 дахь минутад Яаяа Түре, 86 дахь минутад Забалета нар гоолдсоноор “Этихад” цэнгэлдэхэд баяр, хөөр итгэл найдвар ирсэн юм. Тоглолтын нэмэлт цагийн хоёр дахь минутад Ван Перси хаалттай цохилтоос гоолдож тоглолтыг дахин эхлүүлсэн юм. Үүнээс хойш тоглолтын уур амьсгал дээд цэгтээ хүрсэн гэхэд болно. Ситигийн хөгжөөн дэмжигчийн шидсэн хатуу зүйл Рио Фердинандын хөмсгийг сэтэлсэн нь энэ тойргийн онцлох үйл явдал болов. Энэхүү хэргийг Манчестериийн цагдаа нар шалгаж байгаа бөгөөд хэргийн эзнийг тэр дор нь барьсан билээ. Хэрвээ Английн хөлбөмбөг сонирхогч ёс бус үйлдэл гаргавал хөлбөмбөг үзэх эрхээ хасуулдаг хатуу “дүрэм”-тэй юм.  Сүүлийн жилүүдэд Английн прьемер лигт арьс өнгөөр ялгаварлах үзэл эрчимжиж байгаа гэж хэлж болно. Өчигдрийн үйл явдлыг арьс өнгөөр ялгаварласан үзэл гэж тайлбарлаж болохоор байгаа юм. Учир нь Ситигийн хөгжөөн дэмжигч арьс өнгөөр доромжилсон үг хэллэг хэлснийг хохирогч Фердинанд нотолсон байна.  

Өнгөрсөн жил л гэхэд Антон Фердинанд-Жон Терри нарын хооронд арьс өнгөний маргаан болсон билээ. Тухайн үед Жон Терри Антоныг арьс өнгөөр доромжилсон нь нийтэд ил болж, дараа нь Антоноос уучлал гуйж байсан билээ. Үүнийг дэлхийн хэвлэл мэдээллийн хэрэгслүүд “Англи өвчин” гэж бичиж байна.

Челси багт ирсэн шинэ менежер Рафа анхны ялалтаа өнгөрсөн тойрогт байгууллаа. Сандерлэндтэй таарч тоглосон энэ удаагийн тоглолтод “алтан жаал” дубль хийв. 11 болон 45+2 дахь минутад Фернандо Торрес гоол оруулж эхний хагаст Челсигийн тэргүүллийг баталгаажуулсан юм. Харин тоглолтын хоёрдугаар хагас эхлээд удаагүй байхад буюу 49 дэх минутад Мата гоолдож тооны харьцааг 3:0 болгон холдуулжээ. Харин тоглолтын эцсийн цэгийг Сандерлэндийн Адам Жонсон оруулж тоглолт 3:1-ээр дууссан юм. Английн прьемер лигийн түүхэнд хамгийн өндөр үнээр ирсэн Фернандо Торрес Челсид ирснээсээ хойш төдийлөн Ливерпүүлд байсан шигээ тоглож чадахгүй байсан билээ. “Бид маш сайн тоглосон. Гоолын боломжийг ч олон гаргасан. Тиймээс бидэнд тэргүүлэх боломж бололцоо бүрэн бий гэж харагдаж байгаа. Торресийн тухайд сайн тоглох хүч, нөөцтэй тамирчин. Ирэх тоглолтуудад ч энэ тоглолтоо гаргана гэдэгт итгэж байна” гэж шинэ менежер Рафаель Бенитез ярьсан юм. Өнгөрсөн шөнө болсон манчестерийн дербигийн дараа Челси тэргүүлэгчээс долоон онооны алдагдалтай гуравдугаар байрт бичигдэж байгаа билээ.

Английн прьемер лигт сүүлийн 6-7 тоглолтод ялагдал хүлээгээгүй гэх гайхалтай амжилтыг үзүүлээд байгаа Суонси, Норвич багууд хоорондоо таарч тоглосон юм. Өнгөрсөн тойргийн хамгийн олон гоол энэ тоглолтод орсон билээ. Норвич баг өрсөлдөгчөө 4:3-ийн харьцаагаар хожиж 12 дугаар байр руу дэвшсэн юм. Харин Суонси энэ тоглолтод хожигдсоноор наймдугаар байрт бичигдсэн хэвээр үлдлээ. Харин энэ улиралд нэг ч улиралд нэг ч ялалтыг байгуулж чадаагүй яваа Күинс Парк, Виган Атлетиктай тэнцсэнээр хомоол хамсан хэвээр үлдсэн юм. Харин Эвертон баг Тоттенхэмийг ялснаар дөрөвдүгээр байранд бичигдэж эхэллээ. Улирлыг гайхалтай эхлүүлсэн Вест Бромвич Арсеналд 2:0-ийн харьцаагаар ялагдсанаар зургадугаар байр руу ухарчээ.

Ла Лигийн хувьд мөн олон тэмдэглүүштэй үйл явдал тохиов. Хамгийн түрүүнд Мессигийн амжилтыг хэлэх хэрэгтэй. Нэг жилд хамгийн олон гоол оруулсан тоглогчийн рекордыг тэрээр 86 болгож эвдсэн юм. Одоогоос 40 жилийн өмнө Германы домогт тоглогч Герд Мюллерын тогтоосон нэг жилд 85 гоол оруулсан амжилтыг Лионел Месси 86 болж эвдлээ. Барселона баг энэ тойрогт Реал Бетистэй таарч 2:1-ээр хожсон бөгөөд Барселонагийн хоёр гоолыг Месси оруулсан билээ. Улирлыг гайхалтай эхлүүлсэн Атлетико Мадрид энэ тойрогт Депорчуудад хичээл заалаа. Тэд Депорыг 6:0-ээр хожсон бөгөөд таван гоолыг  Колумбын шилдэг тоглогч Радомел Фалкао оруулж мэргэн буучийн хоёрдугаарт бичигдэж эхэллээ. Харин эзэн хааны Мадрид баг Реал Ваяадолидыг 3:2-ын харьцаатай хожиж 3 оноогоо өвөртөлж чадсан юм.

Энэ тойргийн тоглолтод Мессигийн талбайд гарах эсэх, рекордыг эвдэж чадах эсэх нь мэргэжилтнүүдийн анхаарлыг татаж байсан билээ. 2012 он гарсаар 84 гоол оруулаад байсан Месси Ла лигийн хүрээнд өчигдөр Реал Бетистэй хийсэн тоглолтод дубль хийснээр нэг жилийн хугацаанд 86 гоол оруулж, 40 жилийн өмнөх амжилтыг эвдсэн юм. Харин Мессид 40 жилийн амжилтыг эвдэхэд ердөө 25-хан минут хангалттай байсан. Аваргуудын лигийн тоглолтын хүрээнд Бенфика багтай хийсэн тоглолтод өвдгөндөө бэртэл аван гараанд гарах нь эргэлзээтэй байсан ч гараанд гарч тоглон Бетисийн эсрэг 16, 25 дахь минутад дубль хийснээр Барселона ялалтын гурван оноо авч, Месси түүхэн амжилтын эзэн боллоо. Месси ийнхүү Ла лигт нийт 192 гоолтой болж, Барселона клубын түүхэнд Ла лигт хамгийн олон гоол оруулсан тоглогч болж байгаа юм. Мөн тэрээр Барсагийн бүх цаг үеийн мэргэн буучаар тодроод байгаа билээ.

Энэ улирлыг гайхалтай эхлүүлсэн Атлетико Мадрид өнгөрсөн тойрогт Депортиво Ла Корунаг 6:0-ийн харьцаагаар бут ниргэж Реалаас таван онооны илүү хэвээр үлдэв. Энэ тоглолтын таван гоолыг Колумбын тоглогч Радомел Фалкао оруулж мэргэн буучийн жагсаалтын хоёрдугаар байрт бичигдэж эхэллээ. Тоглолтын эхний гоолыг Диего Кошта 23 дахь минутад оруулсан бол ердөө тавхан минутын дараа Фалкао гоол оруулж тооны харьцааг 2:0 болгон холдуулсан юм. Үүнээс хойш Фалкаогийн гоцлон тоглолт Винсентэ Кальдерон цэнгэлдэхэд өрнөсөн гэхэд болно. Эхний үеийн сүүлийн гоолыг тэрээр 42 дахь минутад Тураны дамжуулалтаар оруулсан билээ. Харин тоглолтын хоёрдугаар хагасын 64, 68 болон 71 дэх минутад дараалан гурван гоол оруулж Атлетикогийн ялалтыг улам баталгаажуулсан юм. “Тэр манай багийн түлхүүр тоглогчдын нэг. Ур чадвар бүх юмаараа дэлхийн шилдэг тоглогчдоос дутаад байх юмгүй. Тиймээс бидэнд энэ амжилтаа хадгалах боломж бий гэдэгт бүрэн итгэж болно” гэж Атлетикогийн ерөнхий менежер Диего Симионе ярьжээ.

Баян эзэнтэй болсон Малагачууд Гранада багийг Жакүин, Савиола, Камачо, Санта Круз нарын гоолоор буулган авч дөрөвдүгээр байрт бичигдсэн хэвээр үлдлээ. Харин сүүлийн хоёр тоглолтод хожигдоод байсан Валенсиа клуб, Осасунаг Солдадогийн цорын ганц гоолоор буулган авч 10 дугаар байр руу дэвшсэн юм. Эзэн хааны клуб Реал Мадрид, Реал Ваяадолидыг 3:2-ын харьцаагаар буулган авснаар гуравдугаар байраа хадгалан үлдэв.

Германы бундеслигийн ээлжит тойргийн тоглолт өнгөрсөн амралтын өдрүүдэд болж өнгөрлөө. Лигийг тэргүүлэгч Баейрн Мюнхен клуб ээлжит ялалтаа байгуулсан бол аваргын төлөө ширүүн тэмцэж байгаа Боруссиа Дортмунд клуб Вольфсбургт хожигдсон юм.

Энэ жил гайхалтай формтой байгаа Баейрн Мюнхен клуб Аугсбургыг 2:0-ийн харьцаагаар хожиж 41 оноотой болж лигийг итгэл төгс тэргүүлж эхэллээ. Тоглолтын хоёр гоолыг 40 дэх минутад Томас Мюллер оруулсан бол 63 дахь минутад Марио Гомез оруулж 41 оноотой болон лигийг итгэл төгс тэргүүлж эхэллээ. Харин гуравдугаар байрт бичигдэж байгаа Боруссиа Дортмунд клуб энэ тойргийн тоглолтод Вольфсбургтэй таарч тоглон 3:2-ын харьцаагаар хожигдлоо. Тоглолтын эхний гоолыг шүгэл дуугараад удаагүй байхад буюу 6 дахь минутад Марко Ройс оруулсан ч эхний хагас дуусахаас өмнө тоглолтын 36 дахь минутад Вольфсбургын Диего оруулсан бол ердөө тавхан минутын дараа Налдо оруулж тооны харьцааг 2:1 болгосон юм. Харин тоглолтын хоёрдугаар хагаст тэнцээний гоолыг Яков Блациковски 61 дэх минутад оруулсан байна. Тоглолтын 73 дахь минутад Вольфсбург клубын ялалтын гоолыг Диегогийн дамжуулалтаар Дост оруулж 3:2-ийн харьцаагаар ялалт байгуулсан билээ.

Харин Баейр Ливеркюзэн клуб энэ тойргийн тоглолтод Ханновер клубт 3:2-ийн харьцаагаар хожигдсон ч хоёрдугаар байрандаа бичигдсэн хэвээр үлдсэн билээ. Сүүлийн хоёр тоглолтод хожигдоод байсан Айнтрахт Франкфурт клуб энэ тойрогт Вердер Бременийг 4:1-ийн харьцаагаар хожиж дөрөвдүгээр байранд бичигдэж эхэлсэн юм.

Италийн Сери А-г тун тааруу эхлүүлсэн АС Милан клуб сүүлийн гурван тоглолтод ялалт байгуулснаар долдугаар байрт бичигдэж эхэллээ. Сүүлийн жилүүдэд давгүй амжилт үзүүлэх болсон Наполи клуб энэ улиралд ч гайгүй амжилт үзүүлж гуравдугаар байранд бичигдэж байна. Цомыг хамгаалагч Ювентусчууд 38 оноогоор лигээ тэргүүлж байгаа ч ердөө дөрөвхөн онооны алдагдалтай Интер Милан клуб удаалж байгаа билээ.