Өнөө цагийн шилдэг хөлбөмбөгч гэгдэж буй Лионель Месси домогт Герд Мюллерийн түүхэн амжилтыг эвдлээ. Он дуустал түүнийг дахиад гурван тоглолт хүлээж буй.

2012 он гарсаар 84 гоол оруулаад байсан Месси Ла лигийн хүрээнд өчигдөр “Реал Бетис”-тэй хийсэн тоглолтод дубль хийснээр хуанлийн нэг жилийн хугацаанд 85 гоол оруулсан Мюллерийн амжилтыг ахиулж чадсан юм. Түүнд ердөө 25 минут хангалттай байсан.

Аваргуудын лигийн хүрээнд “Бенфика”-тай хийсэн тоглолтод өвдгөндөө бэртэл авсан Мессигийн тоглох эсэх нь эргэлзээтэй байсан ч гараанд гарч тоглон, 16 болон 25 дахь минутад гоолдсоноор 2012 он гарсаар 85, 86 дахь гоолоо оруулсан юм. Хоёр гоолын дамжуулалтыг хоёуланг нь Иньеста өгчээ. Дашрамд сануулахад, оны шилдгийг тодруулах Ballon d’Or-ын эцсийн шатанд Месси, Иньеста нар, мөн “Реал Мадрид”-ын довтлогч Криштиан Рональду нар тунаж үлдээд буй билээ.

Лионель Месси ийнхүү Ла лигт нийт 192 гоолтой болж, “Барселона” клубын түүхэнд Ла лигт хамгийн олон гоол оруулсан тоглогч болж байна. Мөн тэрбээр “Барса”-гийн түүхэн дэх хамгийн олон гоолтой мэргэн бууч билээ.

“Бетис”-тэй хийсэн тоглолтын дүн 2:1 харьцаатай “Барса”-гийн ялалтаар өндөрлөсөн. “Бетис”-ийн ганц гоолыг 39 дэх минутад Кастро оруулжээ. Тоглолтын дараа Месси “Мэдээж рекорд амжилт эвдэнэ гэдэг гайхалтай. Гэхдээ багийн ялалт илүү чухал” хэмээсэн гэнэ.

Месси өнгөрсөн улиралд Ла лигт 50 гоол оруулсан. Харин шинэ улирал эхэлснээс хойш 23 гоол оруулаад байгаа юм. 2012 оны хувьд тэр 86 гоол оруулаад байна, үүнээс “Барса”-гийн төлөө 74, шигшээ багийнхаа төлөө 12 гоол оруулжээ.