Улсын дуурь бүжгийн эрдмийн театрт өнөөдөр 17.00 цагт  Х.Билэгжаргалын “Ламбугайн нулимс” дуурь эгшиглэх гэж байна. 25 жилийн турш өөрчлөлгүй тайзнаа тоглож ирсэн тус бүтээлийг ДБЭТ-ынхан 2011 онд бүх хувцас, тайз засалтыг нь шинэчилж тавьсан юм. Тайз нь олон солигддог, барааны зах зэрэг олон өнгө төрхийг харуулдаг, эргэдэг тайз ашигладаг гэх мэтчилэнгээр “Ламбугайн нулимс” нь Монголын дуурийн урлагт шинэчлэл хувьсгал авчирсан бүтээл гэгддэг.

Урлаг судлаачид энэхүү дуурийн хөгжмийн талаар маш зоригтой алхам хийсэн гайхамшигтай хөгжимтэй гэдэг. Монголын гэлтгүй гадаадын урлаг судлаачид “Ламбугайн нулимс” дуурийг үзээд биширдэг. Иймээс ч Монголын анхны дэлхийн хэмжээний мэргэжлийн төвшинд бичигдсэн дуурь ч гэдэг билээ.

Өнөөдөр дуурийн театрын тайзнаа тоглох “Ламбугайн нулимс”-т Лодон лам баритон А.Сайнбаяр, залуу бүсгүй Цэрэнлхамд сопрано Ө.Уянга, Цэрэнлхамын эхэд меццо-сопрано Р.Доржхорлоо, Намнанд тенор Б.Дамдинсүрэн, ноёнд  баритон Ч.Чинзориг, хатанд меццо- сопрано М.Дариймаа, ноёны агьд басс-Б.Алтанхуяг, хэлхээ нөхдөд тенор Ч.Түмэндэмбэрэл, Лхагвасүрэн нар тус тус тоглоно. Худалдаачид, банди нар, захын иргэд, зүүдний бүжигт найрал дуучид, балетын жүжигчид оролцон, симфони найрал хөгжим хөгжимдөнө.