Хүчирхийллийн эсрэг үндэсний төвөөс “Жендэрт суурилсан хүчирхийлэлтэй тэмцэх 16 хоногийн аян”-ыг өнгөрсөн арваннэгдүгээр сарын 25-наас энэ сарын 10-ныг хүртэл зохион байгуулж байна. Энэхүү аян нь Монголд 1997 оноос хойш жил бүрийн энэ үед өрнөдөг уламжлалтай бөгөөд аяны үргэлжлэх хугацаа нь Эмэгтэйчүүдийн эсрэг хүчирхийллийг устгах өдрөөс эхлэн Олон улсын Хүний эрхийн өдөр болж байгаа юм. Аяныг дэмжиж Хүний эрх, эмэгтэйчүүдийн эрхийн чиглэлээр ажилладаг төрийн бус байгууллагууд хамтран ажиллаж буй. Энэ хүрээнд өнөөдөр 17.00 цагт МҮОНРТВ-ийн ойролцоо байрлах “Blackbox” театрт Монголын “Эмнести интернэшнл”-ийн зүгээс Бирмийн Ардчилсан намын тэргүүн Ан Сан Су Чигийн амьдралаас сэдэвлэн 2011 онд бүтээсэн “The Lady” хэмээх киног толиулуулах гэж байна.

Уг кино нь ‘Left Bank Pictures’ийн кино найруулагч Энди Харриес,  Лас Бессон нарын  шинэ бүтээл бөгөөд  2012 онд  Эмнести Интернэшнлийн энх тайван, хүний эрхийн төлөө кино сүлжээний  “Олон Улсын хүний эрхийн кино шагнал” хүртжээ.
“Хатагтай” кино нь Нобелийн энх тайвны шагналт, хүний эрхийн төлөө тэмцэгч  Ан Сан Су Чигийн түүхийг өгүүлдэг. Тэрээр өөрийн  зүрх сэтгэлээ даган  цэргийн дэглэм хүчирхийллийн эсрэг хөдөлгөөн өрнүүлэхээр шийднэ. Ингээд  тэр гэр бүл, эх орон гэсэн хоёр сонголтын өмнөх тулах болно. Энэ нь Бирмд одоо ч үргэлжилж байгаа улс төрийн эмх замбараагүй байдлыг зогсоохын төлөө зүрх сэтгэлээ зориулж байгаа эх орончийн  түүх гэлтэй. Киног хэрхэн үзэх тухай мэдээллийг 324705, 99055943 дугаарын утаснаас авах боломжтой юм байна.