БНАСАУ-ын засаг захиргаа Ким Чен Ирын Пхеньян хот дахь Кымсусаны дурсгалын ордон буюу Ким Ир Сены бунханд түүний дарвуулт завийг байрлуулав. Тус улсын зүүн хэсэгт орших Вонсан хотоос дарвуулт завийг баруун эргийн Нампхо боомтод хүргээд тэндээсээ Пхеньян хотод аваачсан байна.

Дарвуулт завийг тээвэрлэхийн тулд боомт хотоос нийслэл хүртэл тусгайлан төмөр зам тавьжээ. Мөн бунхны хананы зарим хэсгийг нураасан аж. Түүгээр нь дарвуулт завийг дотогш оруулжээ. Их удирдагч Ким Чен Ир нас барсны нэг жилийн ойн хүрээнд Умард Солонгосын засаг захиргаа ийм шийдвэр гаргасан юм.

Хойд Солонгосын тэргүүн агсан Ким Чен Ир өнгөрсөн жилийн 12 дугаар сарын 17-ны өдөр зүрхний шигдээс өвчний улмаас таалал төгссөн билээ. Солонгосын шинэ тэргүүнээр түүний хүү Ким Чен Ун тодорсон юм.