Бие даасан тав дахь тоглолтоо “Grand Opera In Night” нэртэйгээр энэ сарын 7-ны өдөр Соёлын төв өргөөний тайзнаа тоглохоор бэлтгэж буй ДБЭТ-ын гоцлол дуучин, дуурийн дива Ө.Уянгын тоглолтын билет худалдаанд гарлаа. Дэлхийн болон Монголын хөгжмийн зохиолчдын сонгодог бүтээл, поп опера дуунуудаас бүрдсэн түүний тоглолтын тасалбар суудлын ангиллаас хамаарч 20, 30, 50 мянган төгрөг юм байна.

Ө.Уянга В.А.Моцартын “Увидаст Лимбэ” дуурийн Шөнийн хатны алдартай ариг бишрэм сайхан эгшиглүүлдэг гургалдай хоолойт. Түүний шувуу адил жиргэдэг энэ ари “Grand Opera In Night”-ын бас нэг чимэг байх нь ээ. Мөн энэхүү тоглолтод түүнтэй ДБЭТ-ын гоцлол дуучин Б.Гомбо-Очир, Ч.Энхтайван, “Нюанс” хамтлагийн дуучин Д.Дүйнхэржав, “Classic gem” хамтлагийн дуучин н.Мөнхбат нар хамтран дуэт дуулах нь. Мөн ДБЭТ-ын гоцлол дуучин Б.Эрдэнэтуяа, поп дива С.Наран нартай хамтран эмэгтэй дуучдын хувьд цөөхөн байдаг дуэт дуугаа толилуулах юм байна.

Сонирхуулахад, тэрээр Урлах эрдмийн дээд сургуулийн “GT” загварын товчооны зөвхөн өөрт нь зориулан урласан даашинзуудаар гангарах нь ээ. Урлах эрдмийн дээд сургуулийн “GT” загварын товчоо түүний өмнөх тоглолтуудынх хувцас болон Дуурийн театрын тайзнаа тоглосон хоёр ч дуурийн гол дүрийнх нь хувцасыг урлан хамтран ажиллаж байжээ.