Өмнөговь аймгийн Манлай сумын Засаг дарга Х.Сугир, аймгийн МАН-ын дарга С.Бөхзориг нар мэдээлэл хийхдээ аймгийн Засаг Б.Бадрааг төсвийн хөрөнгөөс 500 сая 410 мянган төгрөгийг автомашин авах нэрийдлээр хувьдаа завшсан хэмээн мэдэгдэл хийсэн. Мөн Өмнөговь аймагт ажилгүйдэл, ядуурал бодитой буурахгүй, цөөн тооны албан тушаалтнууд богино хугацаанд хэт их баяжаад байгаа хэмээн тайлбарласан удаатай. Аймгийн удирдлагууд “Бүтээн байгуулалтын ажил хийх нэрээр орон нутагт хөрөнгө оруулалтын олон арван тэрбум төгрөгний ажлуудыг тендергүйгээр гүйцэтгүүлэх эсвэл тендер зарласан болж, өөрсдийн ах, дүүс танил талдаа өгч улсын болон орон нутгийн төсвийг хуваан завшиж байна” гэж үзэж байгаа аж. Түүний нэг жишээ нь зам засварын тендер яах аргагүй мөн гэж нутгийн иргэд ч шивэр авир хийж байна.

Өмнөговь аймгийн төв гэрэл цахилгаанаар байнга гачигдаж, өмнөх жил “Ланд унах заяатай ч лаа барих тавилантай” гэсэн хэлц үг хүртэл гарчээ. Энэ он гарсаар гэрэл цахилгаантай бүтэн 7 хоногийг үзээгүй нь ч үнэн. Мөн Өмнөговь аймагт үйл ажиллагаа явуулж буй хоёр телевиз нь аймгийн удирдлагуудын хувийн эзэмшлийнх тул түүгээр нь өөрсдийнх нь бодлогын чанартай мэдээ, мэдээлэл цацагддаг ажээ. Үүгээр ч зогсохгүй нутгийн иргэд Б.Бадрааг газрын наймаанд гар бие оролцоод удаж байгаад шүүмжлэлтэй хандаж байна. Аймгийн төвд өөрийн гэсэн газартай болж, газраа өмчилж авсан нутгийн иргэд цөөхөн атлаа эрх мэдэлтэй, мөнгөтэй хүмүүст бол газрыг шууд олгодог гаж тогтолцоо бий болжээ. Тэрбээр Газрын тухай хууль, Тусгай хамгаалалтай газар нутгийн тухай хуулийг ноцтой зөрчиж, улсын тусгай хэрэгцээний газар болох Дархан цаазтай газарт дур мэдэн аж ахуйн нэгж, байгууллагад газар эзэмшүүлэх, ашиглуулах эрх олгож үүнтэй ижил  захирамжуудыг удаа дараа гаргаж байгаа гэнэ.