Албан тушаалаа урвуулан ашиглаж улсад их хэмжээний хохирол учруулсан нь тогтоогдож, хоёр шатны шүүхээс дөрвөн жилийн ял сонсоод буй МАХН-ын дарга Н.Энхбаярын хэрэг долоон сарын турш шуугиан дэгдээж байгаа ч өдий болтол бүрэн шийдэгдээгүй байна.  Түүний хэргийг шүүх хурал дуншиж байгаа нь улс төрийг ч гацаанд оруулаад буй. 

Н.Энхбаяр болон түүний өмгөөлөгчдийн хүсэлтээр нийслэлийн шүүхийн давж заалдах шатны шүүх хуралдаанаар хэргийг өнгөрсөн арваннэгдүгээр сарын 30-нд хэлэлцэх байсан ч өмгөөлөгчдөд хуралдааны товыг урьдчилан мэдэгдээгүй гэх үндэслэлээр хурлыг хойшлуулах хүсэлт гаргаж, хурлыг долоо хоногоор хойшлуулсан юм. Өөрөөр хэлбэл, Н.Энхбаярын өмгөөлөгчид болох С.Нарангэрэл, О.Сайнбилэг, Б.Оюунбилэг нарт хуралд оролцох бэлтгэл байгаагүй гэж тухайн үед үзсэн.

Н.Энхбаярын авлигын хэрэгт хамсаатан болох нь тогтоогдож ял аваад байгаа До.Чулуунбаатар, Ж.Мягмаржаргал, Д.Дуламсүрэн нарын гомдлыг маргааш Улсын дээд шүүхийн хяналтын шатны шүүх хуралдаанаар хэлэлцэх ёстой. Иргэдийн дунд “Хэрэв маргааш Шүүх хурал дахин хойшилбол яах вэ” гэсэн асуулт байна. Улсын дээд шүүхийн эх сурвалжаас шүүх хуралдаан хэдэн удаа хойшлох боломжтой байдгийг тодруулахад, “Шүүх хурлыг хойшлуулах үндэслэл нь хуулийн дагуу бол хуралдаан хэдэн ч удаа хойшилж болно” гэлээ.

Ямартай ч Н.Энхбаяр ял авсан өдрөөс эхлэн 18 хоног Цагдах хорих 461 дүгээр ангид хоригдсон ч эрүүл мэндийн байдал эрс муудсан гэх шалтгаанаар Нэгдсэн II эмнэлэгт хүргэгдэн эмчлүүлээд гурван сар гаруйн хугацаа өнгөрөөд байна. ШШГЕГ-ын албаны эх сурвалж энэ талаар “Шүүхийн эцсийн шийдвэр гараагүй, төрийн тусгай хамгаалалт буугаагүй болохоор II эмнэлэгт эмчлүүлэх боломжтой. Хэрэв эцсийн шатны шүүхээр түүний гэм буруутай нь тогтоогдвол Цагдан хорих төвийн эмнэлэг рүү хүргэх байх” гэлээ.