Монголчууд ирэх дөрвөн жил аймаг, сум, дүүргээ удирдах төлөөллөө сонгож,  сонгуулийн дүн эцэслэн гарсан. Тиймээс зарим аймгууд Засаг даргаа сонгоод буй. Энэ жилээс эхлэн  орон нутаг өөрсдөө төсвөө захиран зарцуулахаар Төсвийн тухай хуульд тусгасан.  Төсвийн шинэ хуульд зааснаар аймгууд арванхоёрдугаар сарын 5-ны өдөрт багтаан төсвөө батлах ёстой юм. Энэ хугацаа өнөөдөр дуусч буй. Тиймээс орон нутгийн ИТХ хуралдаж, өнөөдрийн байдлаар төсөвөө баталсан байх учиртай.

Гэвч зарим аймгууд Засаг даргаа ч сонгоогүй байна. Одоогийн байдлаар таван аймаг Засаг даргаар томилох хүмүүсээ Ерөнхий сайдтай зөвшилцөн томилуулсан. Үүнд Б.Бадрааг Өмнөговь аймгийн, П.Ганхуягийг Дорноговь аймгийн Засаг даргаар улираан томилуулж, Баянхонгор аймгийн Засаг даргаар Д.Жаргалсайхан, Ховд аймгийн Засаг даргаар Д.Цэвээнравданг томилсон. Мөн Сүхбаатар аймгийн Засаг даргаар Ж.Батсуурийг томилохыг дэмжээд байна. Мөн Хөвсгөл, Дорнод аймгууд Засаг даргаар томилох хүнээ зөвшилцөхөөр ирүүлжээ. Хөвсгөл аймгийн Засаг даргаар Л.Ганболд, Дорнодын Засаг даргаар М.Бадамсүрэнг дэвшүүлээд байгаа аж.