Энэ жилийн баяр наадмаар хоёр бөхөөс сэргээш илэрс­нийг тогтоож, сэргээш хэ­рэг­лэсэн бөхийн нэрийг Монго­лын үндэсний бөхийн холбооноос зарлахад зарим нэг нь дургүйцэж, хувийн асуудлаа хүртэл дэлгэж орхисон талтай. Р.Нямдорж тэргүүн сэргээш хэрэг­лэсэн бөхийн нэрийг олон нийтэд мэдээлснийх нь хариуд Х.Мөнх­баатар арслан “Намайг Р.Нямдорж тэргүүн дандаа ингэж дарамталдаг. Тэр ч байтугай Н.Ганбаатарт унаад өгчих 70 сая төгрөг өгье” гэсэн нь бөхийн хүрээнийхний загатнасан газрыг “маажсан” гэдэг. Аварга А.Сүхбат, Д.Сумъяабазар тэргүүтнүүд хэвлэл мэдээллийн хэрэгс­лээр бөхийн холбооны үйл ажиллагааг ил тод шүүмжил­сэн. Харин Х.Мөнхбаатар арслан “сэргээш хэрэглээ­гүй”, “Р.Нямдорж надад 70 саяыг өгөхийг завдсан” гэж гүрий­сээр өдийг хүргэлээ. Арслан өөрийн биеэр Солон­госоос “чилисэн”, “палисан” гэх эм­ний­хээ хариуг авчирна гээд Гуу­лин улсыг зорьсон сураг­тай. Энэ ч яах вэ. Хам­гийн гол сэргээш хэрэглэсэн гэх хоёр бөхөд ямар шийтгэл ногдуулах нь одоо болтол тодорхой бус байна. Асуудлыг яагаад богино хугацаанд шийдэж чадахгүй байгаа нь энэ жилийн сонгуультай холбоотой гэж учир мэдэх эрхмүүд ярьж сууна. Баяр наадмыг зохион байгуулах хорооны даргаар ажиллаж байсан Шадар сайд асан М.Энхболд, нарийн бичгийн дарга Ц.Болдсайхан нар “Энэ ажил бидэнд хамаа­гүй. Одоогийн албан ту­шаалтнууд нь асуудлыг шийднэ биз” гэсээр өнөөдрийг хүртэл олигтой дуугарч өгсөнгүй. Сэргээш хэрэглэсэн бөхөд ногдуулах шийтгэлийг шийдэх гэж явсаар он дамжих нь.

Уг нь бол Засгийн газрын 2012 оны 98 дугаар тогтоолын долдугаар хавсралтад заас­ны дагуу Шадар сайд үндэсний баяр наадмыг зохион байгуу­лах хорооны даргаар ажиллах ёстой. Үүний дагуу Шадар сайд Д.Тэрбишдагва уг хороог тэргүүлж таарах нь. Харин орлогч дарга, Нийслэлийн Засаг дарга бөгөөд Улаан­баатар хотын захирагч Э.Бат-Үүл, нарийн бичгийн дарга, Нийс­лэлийн Засаг даргын Тамгын газрын дарга Ё.Гэрэл­чулуун, Үндэс­ний бөхийн сал­бар хорооны дарга БОНХЯ-ны Төрийн нарийн бичгийн дарга Ж.Бат­болд нар сэргээш хэрэглэсэн бөхчүүдийн асууд­лыг шийдэж болох ажээ. Гэвч тэд энэ асуудалд анхаарч байгаа шинж огтхон ч алга.

Өмнө нь 2010 онд Б.Со­рон­зонболд заан, Ц.Сумъяа­бэйс начин нар чимгээ ху­раалгаж, 2011 онд Г.Алтан­гэрэл харцага, Ч.Цогбаяр начин нар барилдах эрхээ хоёр жилээр хасуулсан гээд зохих шийт­гэлээ хүлээсэн. Харин Х.Мөнх­баатар, Б.Су­гаржаргал нарыг яах нь тодорхой бус байна. Нэгэнт нэрсийг зарла­сан учраас баяр наад­мыг зохион байгуулах хорооныхон бөхчүүдийг хэр­хэх асуудлыг Ерөн­хийлөгчид өргөн мэ­дүүлэх ёстой.