Тавантолгой төслийг хугацаа алдалгүй эдийн засгийн эргэлтэд оруулчихвал Оюутолгойгоос илүү үр өгөөжөө өгнө гэдэг.  МУИС-ийн Эдийн засгийн сургуулийн хийсэн судалгаагаар Тавантолгой ордоос жилд 10 сая тонн коксжих нүүрс, 40 сая тонн түлшний нүүрс үйлдвэрлэх боломжтой гэжээ. Үүнд нүүрсний экспортын гол тоглогч төрийн өмчит “Эрдэнэс Тавантолгой” ХК дээрх голлох үүрэг гүйцэтгэхийг шинжээчид хэлж байгаа юм. Хятадын эдийн засгийн хөгжлийн удаашрал, гангийн үйлдвэрлэлийн бууралт нь Монголын коксжих нүүрсний экспортод том цохилт өгсөн гэж байгаа ч “Тавантолгой”-н ордоос монголчууд ихийг хүлээж байгаа. Одоогоор Тавантолгойн Зүүн Цанхид төрийн өмчит “Эрдэнэс Тавантолгой” олборлолтоо эхлүүлээд байгаа бол Баруун Цанхийн хэсэгт 2013 онд хөрс хуулалтын ажлаа эхлүүлэхээр шийдвэрлээд байгаа гэнэ.

Эх сурвалжийн мэдээлснээр “Эрдэнэс Тавантолгой”-н шинэхэн захирлууд өмнөх Засгийн газрын урагшгүй бодлогоос болж Хятадын төрийн өмчит “Чалко” компаниас зээлж авсан 350 сая ам.долларын өр барагдаж дуустал гараа хумхиад суухыг хүсээгүй бололтой. Мөн эх сурвалжаас авсан мэдээллээр тус компанийнхан Баруун Цанхийн уурхайгаас гарах бүтээгдэхүүнийг худалдан борлуулах гэрээ хэлэлцээрийг “Чалко”-той бус Хятадын төрийн өмчит “Шенхуа” болон бусад орны худалдан авагчидтай хийх талаар гарц хайж байгаа гэнэ. “Эрдэнэс Тавантолгой” компанийн гүйцэтгэх захирал Я.Батсуурь “Хүний хөгжил санд мөнгө  зээлүүлээгүй бол компанийн нөхцөл байдал арай өөр байх байсан. Өөрөөр хэлбэл, олборлолтоо нэмэгдүүлчихсэн, дэд бүтцийн төслийнхөө аль нэгийг эхлүүлчихсэн байх байлаа. “Чалко”-гоос зээлж авсан 350 сая ам.доллар буюу 418 тэрбум төгрөг их мөнгө шүү дээ. Гэтэл үүнийг сонгуульд зарцуулчихсан. Нэн даруй хүндрэлээс гарах хэрэгтэй. Гарцууд ч харагдаж байна” гэж ярьсан нь эх сурвалжийн мэдээллийг бататгаж буй аж.