Монгол Улсад эрчим хүчний салбар үүсч хөгжсөний түүхт 90 жилийн ойд зориулсан үндэсний бөхийн барилдаан Монгол бөхийн өргөөнд өчигдөр боллоо.  Улсын арслан П.Бүрэнтөгс, улсын харцага Л.Пүрэвжав, А.Цацабшир, Ц.Содномдорж, Э.Батбаатар, А.Бямбажав, улсын начин И.Ёндонсамбуу, Б.Чинзориг, Ш.Жаргалсайхан, Б.Гончигдамба нарын тэргүүтэй улс, аймгийн алдар цолтой хүчит 224 бөх зодоглов. Улсын цолтнуудаас нэгийн даваанд  Э.Батбаатар харцага Аварга дээд сургуулийн С.Тэмүүлэнд өвдөг шороодсон бол хоёрын даваанд у.х А.Цацабшир Төвийн Ш.Алтангэрэлд, у.н Б.Баянмөнх Баянхонгорын Н.Золбоод, у.н Д.Цогзолдорж Завханы Ш.Пүрэвгарьдад тус тус тахим буулгав

Барилдаанд Увс аймгийн Давст сумын харьяат, “Алдар” спорт хороо, “Увснуур” дэвжээ, “ДЦС-4” компанийн бөх, улсын арслан П.Бүрэнтөгс түрүүлж, Хөвсгөл аймгийн Тосонцэнгэл сумын харьяат, улсын харцага Ц.Содномдорж үзүүрлэлээ. Шөвгийн дөрөвт Дундговь аймгийн Дэлгэрцогт сумын харьяат, улсын харцага Л.Пүрэвжав, Өвөрхангай аймгийн Тарагт сумын харьяат, улсын начин Б.Сангисүрэн нар шалгарч тус бүр нэг сая төгрөгийн бай хүртлээ. Түрүү бөхийг гурван сая, үзүүр бөхийг хоёр сая төгрөгөөр байлав.

П.Бүрэнтөгс арслангийн хувьд улсын наадмаас хойш гурван барилдаанд зодоглосон бөгөөд хоёрт нь түрүүлж, нэгд нь их шөвөгт шалгараад байна.