Гурван шатны шүүхээс гэм буруутай нь тогтоогдсон цагдаагийн хуучин удирдлагууд болох Ч.Амарболд, О.Зоригт, Ш.Батсүх, Г.Ганбаатар нарыг цагдан хорих төвүүдэд шилжүүлсэн байна. Тодруулбал, хошууч генерал Ч.Амарболдыг хорих 441 дүгээр анги, хурандаа Ш.Батсүхийг Амгалан дахь хорих 421 дүгээр ангид шилжүүлсэн бол хурандаа О.Зоригт зүрхний титэм судасны өвчлөлтэй байгаа тул одоогоор Улсын гуравдугаар эмнэлэгт хэвтэн эмчлүүлж байна.

Ч.Амарболд, О.Зоригт, Ш.Батсүх нарыг Үндэсний аюулгүй байдлын зөвлөлийн 2008 оны долдугаар сарын 1-ний өдрийн хуралдаанаас өгсөн “Нийтийн эмх замбараагүй байдлыг тараах үйл ажиллагаа явуулахдаа байлдааны галт зэвсэг хэрэглэх буюу хүний амь нас, эрүүл мэндэд хохирол учруулах нөхцөл байдлыг бий болгож болохгүй” гэсэн үүрэг авсан атлаа албан үүргээ зохих ёсоор хэрэгжүүлээгүй, үүний улмаас дөрвөн иргэн нас барж, гурван хүний биед хүнд, хоёр хүний биед хүндэвтэр,  нэг хүний биед хөнгөн гэмтэл учирсан гэмт хэрэгт буруутай болохыг нь гурван шатны шүүхээс батласан билээ.