Испанийн Ла лигт “Барселона” итгэл төгс тэргүүлсээр. Лигийн 14-р тойрогт Каталончууд “Кэмп Ноу” цэнгэлдэхдээ “Атлетик Билбао”-г хүлээн авч, 5:1 харьцаатай ниргэлээ. Талбайн эздээс Пике, Адриано, Фабрегас нар тус бүр нэг гоол болон Лионел Месси дубль хийжээ. Харин “Атлетик Билбао”-гийн нэр төрийн ганц гоолыг Ибай Гомез оруулжээ. Ийнхүү “Барселона” 40 оноотой хүснэгтийг тэргүүлж байгаагийн зэрэгцээ Лионел Месси 2012 онд нийт 84 гоол оруулж алдарт Г.Мюллерын амжилттай зэрэгцэн ирэхэд ганц гоол дутуу болж ирлээ.

Харин тэдний заналт өрсөлдөгч “Реал Мадрид “хүснэгтийн хоёрдугаар байрт яваа “Атлетико Мадрид”-ыг хүлээн авч 2:0 харьцаатай буулган авлаа. 16 дахь минутад К.Роналдо чөлөөт цохилтоос гайхалтай гоолыг оруулж 66 дахь минутад М.Өзил эцсийн цэгийг тавилаа. Ийнхүү “Атлетико Мадрид” 34 оноотой хоёрдугаар байрт хэвээр үлдсэн бол “Реал Мадрид” 29 оноотой болж ирлээ.