ОХУ-д өнгөрсөн лхагва гаригаас эхлэн орсон их хэмжээний цасны улмаас иргэд, албан байгууллагуудад ихээхэн хүндрэл учирсан байна. ОХУ-ын цаг уурын агентлагийн мэдээлснээр нийслэл Москва хотод нэг хоногийн дотор цасны зузаан 20 см-т хүрчээ. Зарим газарт бүр 55 см зузаан цас хунгарлаад байгаа гэнэ. Цас цаашид ч үргэлжлэн орох төлөвтэй аж. Их хэмжээний цасны улмаас авто осол 20 хувиар нэмэгдсэн тухай тус улсын Замын цагдаагийн газраас мэдээлсэн байна. Мөн лхагва гаригаас хойш 70 гаруй нислэгийг цуцалжээ.

ОХУ-д үүнээс өмнө ийм их хэмжээний цас орсон тохиолдол сүүлийн 50 жилд гараагүй гэнэ. Гудамж талбай дахь цасыг цэвэрлэхээр 12 мянган цас цэвэрлэгч машин гаргаж, долоон мянган хүн ажиллаж байгаа юм байна.