Японы нийслэл Токио хотноо Олон улсын жүдо бөхийн холбоо /IJF/-ны “Их дуулга”-ын тэмцээн өнөөдөр эхэллээ. Гурван өдөр үргэлжлэх тус тэмцээний эхний өдөр эрэгтэйчүүдийн 60, 66 кг, эмэгтэйчүүдийн 48, 52 ба 57 кг-ын жингийн барилдаанууд болж байна.

IJF-ийн чансаа өндөр тус тэмцээнд дэлхийн 36 орны 269 жүдоч уламжлал ёсоор эрэгтэй, эмэгтэй тус бүр долоон жинд өрсөлдөнө. Монголоос Ч.Болдбаатар, Д.Амартүвшин /хоёул 60 кг/, Д.Алтансүх /66 кг/, Х.Цагаанбаатар /73 кг/, Н.Дагвасүрэн, С.Ням-Очир /81 кг/, Б.Тэмүүлэн /-100 кг/, Б.Төгөлдөр, Ф.Мөнхзул /+100 кг/, эмэгтэйчүүдийн -78 кг-ын жинд М.Ууганжаргал нарын тамирчид зодоглох юм. Н.Дагвасүрэн, Ф.Мөнхзул, М.Ууганжаргал нарын тухайд Японд амьдардаг бөгөөд Монголоос очсон тамирчидтай нэгдэн, “Их дуулга”-д оролцож буй юм.

Тэмцээний хэсгийн барилдаанууд саяхан эхэлсэн бөгөөд одоогоор 60 кг-ын жинд ОУХМ Ч.Болдбаатар, 66 кг-д Д.Алтансүх нар эхний учраагаа ялаад байна. Мөн 60 кг-д Д.Амартүвшин эхний тойрогт хийлснээр хоёрдугаар тойрогт Казахстаны Асхат Телмановтой барилдахаар болоод байна.

Шигшээ барилдаан Монголын цагаар 15.30 цагт эхлэх хуваарьтай байна.