Хаан спорт хөлбөмбөгийн ертөнцийн хамгийн нэр хүндтэй шагнал Ballon d’Or-ыг энэ жил хэн хүртэх вэ? Эцсийн шатны шалгаруулалтад өмнөх жилийн адил Лионель Месси, Криштиан Рональду нар шалгарснаас гадна Андрес Иньеста тунаж үлдсэн байна.

FIFA-гаас цомын эзнийг ирэх нэгдүгээр сарын 7-нд Цюрих хотноо шалгаруулна. Ингэхдээ спортын сэтгүүлчид, улс орны шигшээ багуудын ахлагч болоод дасгалжуулагчдын саналаар оны шилдгийг тодруулах билээ.

Хөлбөмбөгийн ногоон талбай дахь өнөө цагийн од Лионель Месси өнгөрсөн гурван жил дараалан Дэлхийн оны шилдэг хөлбөмбөгчөөр тодорч, Алтан бөмбөгийн эзэн болсон. Энэ жил ч тэр Ballon d’Or горилогчдоос хамгийн өндөр магадлалтай нь байгаа. Хэрэв тэр олонхийн санал авч чадвал энэ эрхэм шагналыг дөрвөнтөө хүртсэн түүхэн дэх анхны тоглогч болно.

Харин “Реал Мадрид”-ын од, дэлхийн хамгийн үнэтэй хөлбөмбөгч гэх алдрын эзэн Криштиан Рональду өнгөрсөн жил Ла лигт 46 гоол оруулсан. Гэхдээ гол өрсөлдөгч Месси нь зөвхөн дотоодынхоо лигт 50 гоол оруулж амжсан авьяаслаг довтлогч. Рональду 2008 онд дээрх шагналыг хүртэж байсан. Тухайн жил “Реал”-ын хувьд “хөзрийн тамга” нь байж, Жозе Моуриньогийн удирдлага дор Ла лигийн цом хүртсэн билээ.

Иньеста. Өнөө цагийн хамгийн шилдэг “найруулагч”-дын нэг тэрбээр “Барселона” болоод Испанийн шигшээ багийн гоолын бэлтгэгч нь. Европын хошой аварга, Дэлхийн аваргын цом өргөсөн Испанийн багийн гол тоглогчдын нэг. Мессигийн хамт “Барса”-д хүчин зүтгэж, Ла лигт тав, Аваргуудын лигт гурвантаа түрүүлсэн.

Харин FIFA-гийн Оны шилдэг дасгалжуулагчийн шагналд Испанийн шигшээ багийн дасгалжуулагч Висенте дел Боске, “Барса”-гийн экс менежер Пеп Гуардиола, “Реал”-ын Моуриньо нар тунаж үлдсэн байна.

FIFA-гийн оны шилдэгт нэр дэвшигчдийг танилцуулъя.

Шилдэг тоглогч /эрэгтэй/: Лионель Месси (Барселона, Аргентин), Криштиан Рональду (Реал Мадрид, Португаль), Андрес Иньеста (Барселона, Испани)

Шилдэг тоглогч /эмэгтэй/: Марта (Бразиль), Эбби Уамбах, Алекс Морган (хоёул АНУ)

Шилдэг дасгалжуулагч /эрэгтэйчүүдийн багийн/: Висенте дел Боске (Испани), Пеп Гуардиола (экс-Барселона), Жозе Моуриньо (Реал Мадрид)

Шилдэг дасгалжуулагч /эмэгтэйчүүдийн багийн/: Бруно Бини (Франц), Норио Сасаки (Япон), Пия Сандхейж (Швед)

Оны шилдэг гоол: Радамел Фалькао (Атлетико Мадрид, Колумби), Мирослав Стох (Фенербахче, Словак), Неймар (Бразиль, Сантос)