Байгаль орчин, ногоон хөгжлийн яамнаас хоёр жилд нэг удаа зохион байгуулдаг байгаль хамгаалах төрийн бус байгууллагуудыг оролцуулсан улсын зөвлөгөөн маргааш Улаанбаатар хотноо болох гэж байна. Энэ талаар Байгаль орчин, ногоон хөгжлийн яамнаас өнөөдөр “Монгол ньюс” төвд мэдээлэл хийлээ. Тус хуралдаанаар талууд байгаль хамгаалах чиглэлээр төрийн болоод төрийн бус байгууллага хэрхэн хамтран ажиллах, өнгөрсөн хугацаанд хийж хэрэгжүүлсэн ажил ямар үр дүн дагуулсан, цаашид хэрхэн ажиллахаа төлөвлөх аж.

Байгаль цаг уурын эрс өөрчлөлтийн улмаас Монгол орны өмнөд хэсэг цөлжилтөд хамгийн ихээр өртөж байгаагийн зэрэгцээ гол мөрөн их хэмжээгээр ширгэж устаж байгаа юм. Мөн дэд бүтцийн их ажлыг дагаад амьтад амьдрах орчингүй болж байгаа зэрэг олон сөрөг үр дагавар дагуулах болсон. Түүнчлэн уул уурхайн компаниудын хууль бус үйл ажиллагаанаас болж, байгаль экологид ноцтой хохирол учирч байгаа тул энэ бүхнийг зөвлөгөөнд оролцогчид хэлэлцэх юм байна. Улсын хэмжээнд байгаль хамгаалах чиглэлээр 700 гаруй төрийн бус байгууллага үйл ажиллагаа явуулдаг аж.