Шударга өрсөлдөөн хэрэглэгчийн төлөө газраас /ШӨХТГ/ хуурамчаар буюу хууль бусаар шатахууны хомсдол үүсгэсэн гэх шалтгаанаар “НИК” ХХК-ийг 4.9 тэрбум төгрөгөөр торгосон байна. Учир нь ШӨХТГ-аас шатахууны нөөц хангалттай байгаа тул зөвхөн талонтой иргэдэд үйлчлэх зэргээр хязгаарлалт хийж болохгүй гэж анхааруулсаар байтал тус компани энэ сарын 6,7-нд шатахуун борлуулахдаа хязгаарлалт хийн зөвхөн талоноор хэрэглэгчдэд үйлчилсэн аж. Энэ талаар ШӨХТГ-ийн дарга О.Магнайгаас тодрууллаа.

-“НИК”-ийг хууль зөрчсөн гэдгийг хэрхэн баталсан бэ?

-Энэ сарын 6-7 өдрүүдэд нийслэл хот болон хөдөө орон нутагт нефтийн бүтээгдэхийг хязгаарлаж, шатахууны хомсдол үүсгэсэн асуудлыг шалгаж үзэхэд улсын хэмжээнд дунджаар ердийн хэрэглээний 22 хоногийн нөөцтэй байсан ба А80 35 өдөр, А92 27 өдөр, дизель түлшний 4 хоногийн нөөцтэй байсан ба замдаа ачигдаад ирж байсныг тооцоход А80, А92 44 хоног, дизель 12 хоногийн нөөцтэй байсан тогтоогдсон.

-Торгуулийг хэмжээг яаж тогтоосон бэ?

-Давамгай байдалтай аж ахуйн нэгж нь зохиомлоор тухайн бараа бүтээгдэхүүний хомсдол бий болгох, бараа бүтээгдэхүүний үйлдвэрлэл, борлуулалтыг зогсоох, хэмжээг хязгаарлах үйлдэл хийсэн бол Өрсөлдөөний тухай хуульд зааснаар 16 хүртэлх тэрбум төгрөгөөр торгох учиртай байсан юм. Харин ч бид харгалзан үзээд Өрсөлдөөний тухай хуулийн 7.1.1, 27.1.2-т заасныг үндэслэн дөрвөн тэрбум 965 сая төгрөгийн торгууль ноогдууллаа.

-Нефть импортлогчид дур мэдэн шатахуун борлуулахаа хязгаарлах, цаашилбал гэнэт үнэ нэмэх гэх зэргээр үе үе хэрэглэгчдийг сандаргадан. Цаашид ер нь энэ асуудалд ямар зохицуулалт хийх ёстой вэ?

-Стратегийн салбарт ажиллаж байгаа байгууллагууд хариуцлагатай байх ёстой. Дураараа асуудлыг шийдэж, мэдэгдэл хийх ёсгүй. Заавал төртэй зөвшилцөх ёстой. Хэрэв хариуцлагагүй мэдэгдэл хийснээр нийгэмд, олон нийтэд гэм хор учирвал Эрүүгийн болон Захиргааны байцаан шийтгэх хуулинд зааснаар шийтгэл оногдуулах болно.

-Хуулинд хариуцлага тооцох талаар хэрхэн тусгасан байдаг юм бэ?

-Эрүүгийн болон Захиргааны байцаан шийтгэх хуулинд энэ асуудлаар нэмэлт өөрчлөлт оруулах төсөл боловсруулсан. Удахгүй УИХ-д өргөн барьж, батлах байх.