2008 оны сонгуулийн дараах үймээн самууны үеэр албан тушаалаа урвуулан төрд онц их хэмжээний хохирол учруулсан хэрэгт буруутгагдан, анхан болон давж заалдах шатны шүүхээс ял сонссон цагдаагийн удирдлагууд болох хошууч генерал Ч.Амарболд, цагдаагийн хурандаа О.Зоригт, Ш.Батсүх нарыг шүүх хурал тун удахгүй эхлэх гэж байна. Хуралд шүүгчдэгчид буюу Ч.Амарболд нар оролцохгүй бөгөөд зөвхөн шүүгдэгчдийн өмгөөлөгчид оролцох юм. Шүүх хуралдаан хаалттай явагдах ч  хурлын шийдвэрийг нээлттэй мэдээлэх аж.

Сүхбаатар дүүргийн шүүхээс өнгөрсөн зургадугаар сарын 7-нд хошууч генерал Ч.Амарболд, цагдаагийн хурандаа Ш.Батсүх нарт 3.6 жилийн, цагдаагийн хурандаа О.Зоригтод 2,6 жилийн ял оноосон бол цагдаагийн дэд хурандаа Г.Ганбаатар Өршөөлийн хуульд хамрагдан суллагдсан. Тэднийг эрх мэдэл албан тушаалынхаа байдлыг урвуулан, албаны бүрэн эрхээ хэрэгжүүлээгүйгээс төрд онц их хэмжээний хохирол учруулсан хэрэгт буруутгаж ялласан юм.

Давж заалдах шатны шүүх буюу Нийслэлийн шүүх тэдний гомдлыг өнгөрсөн сарын есдүгээр сарын 21-нд  хэлэлцээд анхан шатны шүүхийн шийдвэрийг хэвээр үлдээсэн.

Улсын дээд шүүхэд өнөөдөр өмнөх хоёр шатны шүүхийн шийдвэр Эрүүгийн байцаан шийтгэх хууль болон Эрүүгийн хууль зөрчсөн эсэхийг дэнслэх юм.