Олон улс, тив, дэлхийн чанартай тэмцээн, уралдаанд амжилт гаргасан тамирчдыг өнөөдөр салбарын сайд нь хүлээн авч, хүндэтгэл үзүүллээ. Соёл, спорт, аялал жуулчлалын сайд улс тунхагласны 88 жилийн ойн тэмдэглэлт энэ өдөр нийт 31 тамирчин, дасгалжуулагчид 141 сая төгрөгийн мөнгөн шагнал гардуулсан байна. Тодруулбал, жүдо бөхийн Дэлхийн цомын тэмцээнээс мөнгөн медаль хүртсэн Ц.Наранжаргал, Б.Тэмүүлэн, Д.Сумъяа, хүрэл медалийн эзэн Д.Алтансүх, Ч.Болдбаатар, О.Ууганбаатар, шатрын өсвөрийн ДАШТ-ий аварга Э.Баасансүрэн, Ц.Лхагвасүрэн, хүрэл медалийн эзэн Г.Маралгуа, мөн аэробик гимнастикийн ДАШТ, сирым бөхийн ДАШТ-ээс медаль хүртсэн тамирчид, тэдний дасгалжуулагчдад мөнгөн шагнал олгожээ.

ССАЖ-ын сайд Ц.Оюунгэрэл тамирчидтай уулзах үеэр жүдо, сирым бөх, аэробик гимнастик болон шатрын спортынхонд тулгарч буй асуудлын талаар ярилцав. Аэробикийнхний тухайд зориулалтын шал байдаггүй, хөрөнгө мөнгөний асуудлыг шийдээд шал худалдан авсан ч дэсэх заал учир дутагдалтай гэдгийг сайдад дуулгав. Харин шатрынхны тухайд оюуны спорт гэдгээр нь онцлох учиртай, тамирчдын амжилтад харгалзах мөнгөн шагналын үнэлэмж бага гэдгийг хэлсэн юм. Мөн бэлтгэл сургуулилт хийх заал талбайн хүрэлцээ муу байгаа талаараа тамирчид учирлав. Харин ССАЖ-ын сайд Ц.Оюунгэрэл “Яамны зүгээс эхний ээлжинд спортын салбарынхны хууль эрхзүйн орчны тал дээр туслахаар анхаарч байна. Одоогийн байдлаар спортын барилга байгууламжийн тухай хууль, биеийн тамир, спортын хороодын эрх зүйн байдлын тухай хууль, биеийн тамир спортын тухай хуулийн шинэчилсэн найруулга дээр ажиллаж байна. Та бүхэн хуулийн ажлын хэсэгт орж ажиллан санал хүсэлтээ хэлэхийг зөвлөж байна” гэлээ.