БНСУ-ын реппер Psy-гийн Gangnam Style YouTube сайтын хамгийн олон үзэгчтэй видео болжээ. Gangnam Style видеог өнгөрсөн долдугаар сард тус сайтад тавьснаас хойш давхардсан тоогоор 808 сая хүн үзсэн гэсэн судалгаа гарчээ. БНСУ-ын нийслэл Сөүл хотын дагуул Ганнам дүүргийн оршин суугчдыг элэглэсэн хошин видео клип өнөөгийн бүх стандартыг эвдсэнээр Өмнөд Солонгос төдийгүй Ази, АНУ-д стандарт бус сенсаац болж, 34 настай репперийг алдаршуулсан.

Түүний энэ хачин дуу бүжгийн дагаж дуурайж хийгээгүй хүмүүс цөөн бөгөөд НҮБ-ын Ерөнхий нарийн бичгийн дарга, Хятадын тэрс үзэлтэн Ай Вэйвэй, Филиппинийн шоронгийн хоригдлууд гээд дэлхийн өнцөг булан бүр дэх олон өөр хэл соёлтой хүмүүс дуурайн бүжиглэсэн юм. Тэр бүү хэл роботод хүртэл түүний бүжгийг “зааж”  өгсөн билээ. Дэлхийн 28 оронд одоо ч хит дуу хэвээр буй Gangnam Style “MTV Europe Music Awards”-аас оны шилдэг клип шагналыг авсан юм.