Хаан спорт хөлбөмбөгийн дэлхийн аварга шалгаруулах тэмцээний шигшээ тоглолт, 2016 оны зуны 31 дэх удаагийн олимпийн наадмын нээлт болоод хаалтын ёслол болох “Maracana” нэртэй цэнгэлдэх хүрээлэнгийн барилгын ажил ирэх хавар дуусах тухай Бразилийн Засгийн газраас мэдээлжээ. Төлөвлөгөө ёсоор 2013 оны хоёрдугаар сарын 28-нд барилгын ажил дуусах гэнэ. Орчин үеийн содон шийдэл бүхий тус цэнгэлдэх 78 мянган хүний суудалтай байх юм.

1950 онд тус цэнгэлдэхэд хөлбөмбөгийн ДАШТ-ий аваргын төлөөх тоглолт болж, Бразилийн шигшээ баг цэнгэлдэхэд битүү шавсан 200 мянган үзэгч, хөгжөөн дэмжигчдийнхээ өмнө ялагдаж байсан юм.

2014 оны хөлбөмбөгийн ДАШТ-ийг нутагтаа зохион байгуулах эрх авсан Бразиль өдгөө тус цэнгэлдэхийг шинэчилж, орчин үеийн өнгө төрх, техник технологиор тоноглох гэж буй юм. Харин шинэчлэн тохижуулсан тус цэнгэлдэхэд Бразилийн хөлбөмбөгийн шигшээ баг анхны тоглолтоо зургадугаар сарын 2-нд Английн шигшээ багийн эсрэг хийх гэнэ.