Грекийн хүн амын бараг гуравны хоёртой тэнцэх интернэт хэрэглэгчдийн хувийн ID-г хулгайлсан этгээдийг тус улсын цагдаа нар баривчилжээ. 33 настай, компьютерийн программист мэргэжилтэй этгээдийг мөн есөн сая гаруй хүний ID карт, автомашины серийн дугаар, татвар төлөгчийн хувийн мэдээлэлтэй файлыг бусдад худалдсан хэрэгт сэжиглэж байна.

Грекийн цагдаа нар одоо сэжигтэн этгээд дээрх хувийн мэдээлэлтэй файлуудыг хэнд худалдаж, юунд ашиглаж байсныг тогтоохоор мөрдлөг явуулж байгаа юм байна. Тус улсын эдийн засгийн гэмт хэргийн мөрдөгчид сэжигтэн этгээд Засгийн газрын серверт нэвтэрсэн эсэхийг давхар шалгаж байгаа гэнэ.  11 сая хүн амтай Грекийн хүн амын бараг гуравны хоёр хувийнх нь хувийн мэдээллийг агуулсан файлыг цагдаа нар нэгжлэг хийх үеэр гэрээс нь олж илрүүлжээ.

Одоогоор сэжигтэн этгээдэд ямар нэгэн ял оноогоогүй байгаа бөгөөд түүнийг шүүх хурал удахгүй болох гэнэ.