Японы “Тошиба” корпораци цөмийн сүйрлийн үед цацраг идэвхит бодис ихээр алдагдсан бүсэд ажиллах робот зохион бүтээжээ. Гэвч корпорацийн зохион бүтээгч инженерүүд робот ямар чадвартай болон газар хөдлөлтөд бүрэн сүйдсэн Фукушима Даичи АЦС руу үүнийг илгээх эсэхээ нууцалж байна.  Дөрвөн хөлт энэхүү робот нь цацраг идэвхит бодис алдагдсан, хүн байх аргагүй бүсэд очиж, шатаар өгсч, байшин руу авирах үйлдэл хийж чаддаг гэнэ. “Тошиба” корпорацийн шинэ бүтээл роботын танилцуулгад бичсэнээр роботыг цацраг идэвхитэй бүсэд ч утасгүй холбоогоор удирдаж болох бөгөөд сүлжээ унасан үед өөрийгөө дахин цэнэглэдэг аж.

Токиогийн эрчим хүчний компани роботыг өнгөрсөн 2011 оны гуравдугаар сард болсон аймшигт газар хөдлөлт, цунамийн үеэр сүйдсэн Фукушима Даичи АЦС орчмын хог хаягдлыг цэвэрлэхэд ашиглаж магадгүй гэнэ. Гэвч робот хараахан төгс бүтээл болж чадаагүй бөгөөд шатаар нэг гишгүүр өгсөхөд нэг минут зарцуулдаг удаанаас гадна заримдаа системийн доголдлоос болж хөл нь ажиллагаагүй болох, унавал хэн нэгийн тусламжгүйгээр босч чаддаггүй сул талтай аж. Гэвч Фукушимагийн цацраг идэвхит хорт бодис ихээр алдагдсан бүсэд хэн ч зориглон очиж чадахгүй байгаа энэ үед ийм робот бүтээж, тус бүсэд ажиллуулах зайлшгүй шаардлагатай байгаа аж.