МҮОХ-ны Олимпийн чуулган ирэх сарын 19-нд болно. Дөрвөн жилд нэг удаа хуралдаж, МҮОХ-ны дүрмийн өөрчлөлтийг хэлэлцэхээс гадна ирэх дөрвөн жилд тус байгууллагыг удирдах ерөнхийлөгч, дэд ерөнхийлөгч болоод гүйцэтгэх зөвлөлийн гишүүд, хяналтын зөвлөлийг сонгодог тус чуулганд МҮОХ-ны гишүүн спортын холбоод, аймаг, дүүргийн олимпийн зөвлөл, олимпийн медальтнуудын төлөөлөл оролцдог уламжлалтай.

Энэ удаагийн чуулганаар Бээжингээс Лондон хүртэлх олимпийн цикльд хийж бүтээсэн ажлын тайлангаа тавьж, зуны XXX олимпийн амжилтаа дүгнэхээс гадна уламжлал ёсоор удирдлагуудаа сонгоно. МҮОХ-ны ерөнхийлөгчийн төлөө одоогийн тэргүүн Д.Загдсүрэнгээс гадна МҮОХ-ны тэргүүн дэд ерөнхийлөгч, Олон улсын оюутны спортын холбооны ерөнхий санхүүч, МОСХ-ны ерөнхийлөгч Д.Баясгалан, Монгол Улсын ерөнхий прокурор, МЖБХ-ны тэргүүн дэд ерөнхийлөгч Д.Дорлигжав нар өрсөлдөхөөр болжээ.