МАН-ын нарийн бичгийн дарга Ж.Сүхбаатарыг У.Хүрэлсүхтэй гар зөрүүлсэн тухай мэдээлэл телевизээр цацагдав. Журмын нөхөд юунаас болж муудсаныг Ж.Сүхбаатараас тодруулахад “Огт дуулаагүй юм байна” хэмээн гайхаж байлаа. 

-Таныг У.Хүрэлсүхтэй гар зөрүүлсэн талаар телевизээр мэдээлсэн шүү дээ?

-Би өөрөөс чинь л сонсч байна. Тийм зүйл болоогүй. У.Хүрэлсүхтэй гар зөрүүлэх нь битгий хэл ойрд тааралдаагүй шүү дээ. Наадах чинь манай намын У.Хүрэлсүх болон бидний үеийн залуучуудын нэр хүндийг унагах гэсэн хар пиарын явуулга л биз дээ. У.Хүрэлсүхтэй УИХ-ын гишүүнээс чөлөөлөгдөх хүсэлтээ гаргаснаас нь хойш тааралдаагүй. Тэгээд ч тэр асуудлыг хэлэлцэж байхад У.Хүрэлсүх Монголд байгаагүй гэж ойлгож байгаа шүү.

-Ойрын үед та хаагуур байсан юм бэ. Нам дээрээ л байна уу?

-Би МАН-ын орон нутаг хариуцсан нарийн бичгийн дарга. Иймээс орон нутгийн сонгуулийн сурталчилгааны ажлаар байнга хөдөө явж байлаа. Орхон, Булган, Өмнөговь гээд олон газраар явсан. Хамгийн сүүлд л гэхэд намын даргатайгаа сонгуулийн сурталчилгаа дуу­сахын өмнөхөн Дархан-Уулд ажиллаад ирлээ. Орон нутгийн сонгуулийн санал өгч байгаа ийм үед л зодоон цохион гэж арга ядсан хуучин мэхээ хэрэглэж байгаа юм болов уу. Гэхдээ одоо ийм бохир арга ядсан мессеж хол явахгүй ээ. Монголчууд энэ байтугайг мэддэг болсон. Та харж л байгаа биз дээ, миний зүв зүгээр байгааг.