Монгол Ардын намын ерөнхий нарийн бичгийн дарга Г.Занданшатар сонгуулийн талаар сэтгүүлчдэд мэдээлэл хийлээ. Тэрбээр Аймаг, сум, дүүргийн ИТХ-ын сонгуулийн санал хураалтын явцад хэсгийн хороодод ажилласан ажиглагч нараараа дамжуулан авсан мэдээллийг танилцуулсан юм.

Орон нутгаас ирүүлсэн мэдээллээр Дундговь аймагт 23 суудлаас 14-т нь Монгол Ардын намын нэр дэвшигчид ялалт байгуулжээ. Мөн Говь-Алтай аймагт 21-ээс 17, Өвөрхангай аймагт 28-аас 18, Сэлэнгэ аймагт 21-ээс 15, Дархан-Уул аймагт 21-ээс 13, Завхан аймагт 29-өөс 13, Говьсүмбэр аймагт найман суудлаас тавд нь, Дорнод аймагт 23-аас 13-т нь МАН-аас нэр дэвшигчид ялалт байгуулсан байна. Бусад аймгуудын тухайд дүн эцэслэгдэн гараагүй байна гэлээ.

Харин нийслэлийн дүүргүүдэд ирц хангалтгүй байсныг МАН-ын ерөнхий нарийн бичгийн дарга Г.Занданшатар хэлэв. МАН-ын ажиглагчдын ирүүлсэн мэдээллээр нийслэлийн Багануур дүүрэгт 25 суудлаас 13-т МАН-ын нэр дэвшигчид ялалт байгуулсан, мөн Багахангай, Налайх дүүрэгт тус нам ялсан гэлээ. Түүнчлэн МАН-аас нэр дэвшигчид Сонгинохайрхан дүүрэгт 11, Баянзүрх дүүрэгт дөрвөн мандат аваад байна. Харин Чингэлтэй дүүргийн тухай сонгогчдын ирц бүрдээгүй, бусад дүүргүүдийн мэдээлэл ирээгүй байна гэв.