Аймаг, сум, дүүргийн ИТХ-ын төлөөлөгчийг сонгох сонгууль орон даяар өнөөдөр 07.00 цагаас эхэлж сая 22.00 цагт дууслаа. Нийт 1.851.103 сонгогч саналаа өгөх ёстойгоос Сонгуулийн ерөнхий хорооноос өгсөн 20.00 цагийн байдлаарх ирцийн мэдээгээр аймгуудад санал хураалт 50 хувьд хүрлээ. Харин нийслэлийн хэмжээнд Багануур, Багахангай, Налайхаас бусад дүүрэгт сонгуульд саналаа өгсөн сонгогчийн ирц 50 хувьд хүрээгүй байгаа. Гэхдээ санал хураах цаг дуустал хоёр цаг дутуу байсан тул энэ хооронд амжиж иргэд саналаа идэвхитэй өгсөн бол сонгогчийн ирц хуульд заасан хэмжээнд хүрэх ёстой. Сонгогчийн ирцийн мэдээг эцсийн байдлаар 23.00 цагт Сонгуулийн ерөнхий хорооноос сэтгүүлчдэд өгөхөөр төлөвлөөд байна. Тиймээс тэр үед энэ талаарх мэдээлэл тодорхой болно.

СЕХ-ноос гаргасан 20.00 цагийн байдлаарх сонгогчдын ирцийн мэдээгээр улсын хэмжээнд сонгогчдын ирц 52,9 хувьтай байсан юм. Үүнээс орон нутагт 58,71 хувь, нийслэлд 45,63 хувьтай байлаа.

Албан бус мэдээллээр нийслэлийн Сүхбаатар дүүрэгт сонгогчдын ирц 50 хувьдаа хүрсэн байна.

Аймаг, дүүргийн сонгуулийн ирцийн мэдээ