Тус телевизийн сурвалжлагч Ж.Булганаагийн дамжуулснаар Төв аймагт орон нутгийн сонгууль хэвийн үргэлжилж байна. Аймгийн хэмжээнд 59 мянган сонгогч саналаа өгөх ёстой бөгөөд Зуун мод суманд нийт долоон хэсгийн хороо байгаа бол 27 суманд 98 хэсгийн хороо ажиллаж байгаа аж. Зуун мод суман дахь долдугаар хэсгийн хороонд 07.00-09.00 цагийн байдлаар 76 сонгогч саналаа өгөөд байна. Тус хэсгийн хороонд сонгуулийн насны 2112 иргэн бүртгэлтэй аж. Хэсгийн хороодоос өгч байгаа мэдээллээр Зуун мод сумын хэмжээнд өглөөний 11 цагийн байдлаар ахмадууд сонгуульдаа идэвхитэй оролцжээ. Нэг зүйлийг онцлоход, Ус цаг уурын хүрээлэнгээс ирүүлсэн мэдээгээр Төв аймагт цаг агаар үдээс хойшдоо муудах төлөвтэй байгаа аж. Тиймээс сумдад байдал хүндэрч болзошгүй тул үдээс өмнөдөө амжиж саналаа өгөхийг уриалж байна. 

Багануур дүүрэгт  Eagle news телевизийн сурвалжлагч М.Төгөлдөр ажиллаж байна. Түүний мэдээлснээр тус дүүрэгт сонгуулийн насны 18639 иргэн Багануур дүүрэгт бүртгэгдсэн байгаа аж. Тус дүүргийн хоёрдугаар хэсгийн хороонд 07.00-09.30 цагийн байдлаар 300 орчим иргэн саналаа өгчээ. Саналаа өгч байгаа иргэдийг 40-өөс дээш насныхан тэргүүлж байна. Сонгуулийн үйл ажиллагаанд намуудын ажиглагч нараас гадна Сонгуулийн ерөнхий хорооны ажиглагчид болон АНУ-ын Элчин сайдын яамнаас ажиглагч оролцож байна.