УИХ-ын дэд дарга С.Баярцогт, УИХ-ын гишүүн С.Ганбаатар нар өнөөдөр МҮОНТ-ээр Оюутолгойн гэрээний асуудлаар халз мэтгэлцээнд оролцохоор мэдээлэгдээд байсан юм. Мэтгэлцээн товлосон хугацаандаа болох эсэхийг тодруулахад, “Уг асуудлыг улс төржүүлэхгүй байх үүднээс УИХ-ын даргын шийдвэрээр энэ сарын 23-ны өдөр болтол хойшлуулсан. Халз мэтгэлцээн энэ сарын 23-ны өдөр МҮОНТВ-ээр шууд явна” гэдгийг эх сурвалж хэллээ.

Харин УИХ-ын гишүүн С.Ганбаатарын зүгээс “Мэтгэлцээнийг хойшлуулахгүй. Өнөөдөр МҮОНРТ-д бусад гишүүдийн хамт очно” хэмээн мэдэгдээд байгаа. Өнөөдөр товлосон мэтгэлцээнийг ч бас УИХ-ын гишүүн С.Ганбаатар дангаараа хэвлэлийн бага хурал хийж, хэвлэлийнхэнд зарлаад дараа нь С.Баярцогт гишүүнд мэдэгдсэн аж. УИХ-ын гишүүн С.Баярцогт түүний саналыг хүлээн авч, мэтгэлцээнд оролцохоор болсон авч УИХ-ын даргын зүгээс “Оюутолгойн хөрөнгө оруулалтын гэрээний асуудлыг сонгуулийн өмнө улс төржүүлж, аль нэг талд давуу байдал олгохгүйн тулд сонгуулийн дараа явуулах нь зүйтэй” гэж үзжээ. 

Тиймээс УИХ-ын тамгын газраас халз мэтгэлцээнийг хойшлуулах тухай шийдвэрийг хоёр гишүүнд өнгөрсөн долоо хоногт албан ёсоор мэдэгдсэн байна.