Бээжин хотод өнөөдөр ХКН-ын Төв хорооны Бүгд хурал болж БНХАУ-ын дэд дарга Си Жинпинийг ХКН-ын Төв хорооны ерөнхий нарийн бичгийн даргаар сонгожээ. Тэрээр мөн Хятадын Цэргийн зөвлөлийн дарга боллоо. Ингэснээр тэрээр хэрэг дээрээ Хятадын шинэ удирдагч болох зам нь шулуудлаа. Түүний Цэргийн зөвлөлийн орлогч нараар генерал Сюй Цилян, Фань Жанлун нарыг сонгожээ.

ХКН-ыг ирэх 10 жилд удирдах бүрэлдэхүүнд  Төрийн зөвлөлийн Ерөнхий сайдын орлогч Ли Кэцян, Гадаад худалдаа, Ерөнхий  сайдын санхүү эрхэлсэн орлогч Ван Цишань, Ерөнхий  сайдын орлогч бөгөөд Чунцин хотын намын хорооны даргаар Бо Силайн дараа сонгогдсон Жан Дэцян болон ХКН-ын өндөр албаны түшмэдүүд болох Юй Жэншэн, Лю Юньшан, Шаньдун мужийн захирагч асан Жан Гаоли нарыг сонгожээ.

Ирэх 2013 оны гуравдугаар сард болох Бүх Хятадын Ардын төлөөлөгчийн Их Хурлаар Си Жинпинийг БНХАУ-ын даргаар, Ли Кэцяныг Төрийн зөвлөлийн Ерөнхий сайдаар батлах нь тодорхой боллоо.