NBA-ын “ЛА Лейкерс” багийн удирдлага дасгалжуулагч Майк Брауныг өнгөрөгч баасан гаригт ажлаас нь халсан. Харин түүний оронд Майк Ди’Антониг дасгалжуулагчаар сонгосон тухай “Лейкерс”-ийн хэвлэлийн төлөөлөгч Жон Блэк энэ долоо хоногийн эхээр мэдэгджээ. Багийн тоглогчдоос Коби Брайнт, Стив Нэш нар шинэ дасгалжуулагчдаа сэтгэл хангалуун байгаагаа илэрхийлсэн байна. Нэшийн хувьд “Финикс Санс”-т байхдаа Ди’Антонигийн удирдлага дор тоглож байсан, тухайн үед 2005, 2006 онд MVP шагналыг хоёр жил дараалан хүртсэн юм. Харин Брайнт өнгөрсөн зун Лондонгийн олимпод оролцсон АНУ-ын шигшээ багт хамтран ажиллаж байсан билээ.

NBA-ын шинэ улирлыг “Лейкерс”-чүүд тун хангалтгүй эхлүүлж, эхний таван тоглолтын дөрөвт нь хожигдсон. Ингээд Майк Браун ажлаасаа халагдсан билээ.

Ди’Антони өмнө нь Денвер, Финикс, Нью-Йорк хотын багуудыг дасгалжуулж байсан юм.