Их эзэн Чингис хааны 850 жилийн ойг тохиолдуулан Чингис хааны мэндэлсэн өдрийг монголчууд түүхэндээ анх удаа өнөөдөр тэмдэглэж байна. Ойн хүрээнд олон арга хэмжээ зохион байгуулсны нэг нь Монголын их хаадын хөргийг залах ёслол байлаа. Их хаадын хөрөг залах ёслолд УИХ-ын дарга З.Энхболд, Ерөнхий сайд Н.Алтанхуяг болон УИХ-ын гишүүд оролцлоо. Төрийн тулганы өргөө болох Их өргөө гэрт залсан хаадын зургийг зураач Ц.Бадмаараг судлаач, эрдэмтдийн хамт бүтээсэн юм байна.

Монголын түүхэнд төр барьж, төр улсаа мандан бадруулсан их эзэн Чингис хаанаас өмнөх болон хойшхи хаадын хөргийг Төрийн их хүдэтгэлийн өргөөнд залж, гал тахих ёслолыг үйлдлээ. Эзэн Чингис хаан болон Монголын төр барьж байсан хаадын зургийг бүтээж, судалгаа хийхэд 20 гаруй жилийг зарцуулсан, ингэхдээ түүхч эрдэмтдийн судалгаан дээр үндэслэсэн гэдгийг зураач Ц.Бадмаараг онцолж байлаа. Д.Майндар гэх зохиолч, түүхч 20 жилийн хугацаанд хаадын хөргүүдийг бүтээхдээ цээж зураг мэт бүтээж байсан ч хожим бүтнээр нь зурсан аж.