Монгол-Оросын хамтарсан уулын баяжуулах “Эрдэнэт” үйлдвэрийн Төлөөлөн удирдах зөвлөлийн хурал болж байна. Тус хуралд оролцохоор ОХУ-ын төрийн өмчит  “Ростехнологи” корпорацийн гүйцэтгэх захирал Сергей Чемезов өнөөдөр өглөө Улаанбаатарт ирсэн юм. Тэрбээр мөн “Монголросцветмет” нэгдлийн Зөвлөлийн хуралд оролцохоор төлөвлөжээ.

“Эрдэнэт үйлдвэр”-ийн Зөвлөлийн хурлаар цөөнгүй асуудал хэлэлцэхээр төлөвлөсөн бөгөөд тэдгээрийн дунд үйлдвэрийн захирлуудын халаа сэлгээ, шинэ томилгоо яригдаж болзошгүй. Монголд УИХ-ын сонгууль болж, төрийн яам, агентлагуудын дарга нар ээлж дараалан солигдож, “цус шинэчлэгдээд” дуусч байна. Харин одоо төрийн мэдлийн компаниудын гүйцэтгэх захирлуудыг халж солих ээлжит давалгаа ирнэ гэсэн хүлээлт байгаа юм.

“Эрдэнэт”-ийн ТУЗ-ийн хурлаас гарсан шийдвэрүүдийн талаар маргааш Төрийн ордонд сэтгүүлчдэд мэдээлэл хийх ажээ.