Цагаан ордны цахим хуудас дахь иргэдийн санал хүсэлтийг хүлээн авах хэсэгт тус улсын 47 мужийн иргэд салан тусгаарлах хүсэлтээ албан ёсоор гаргасан тухай Dailycaller.com сайтад мэдээлжээ. АНУ-ын харьяанд байдаг 50 мужаас Мейн, Вермонт болон Вашингтоноос бусад мужийн иргэд холбооноос гарах хүсэлтэй байгаагаа илэрхийлсэн байна.

Арваннэгдүгээр сарын 6-нд болсон АНУ-ын ерөнхийлөгчийн сонгуулийн дараах өдөр Луизиана мужийн Слайдел хотын иргэн Майкл гэгч Луизиана мужийг салан тусгаарлах тухай хүсэлтээ албан ёсоор гаргасан байна. Харин өдгөө энэ хүсэлтийг дэмжиж, тус мужийн 29 мянга гаруй иргэн гарын үсгээ нэгтгэжээ. Түүнчлэн Техас мужаас 78 мянган иргэн салан тусгаарлах хүсэлт гаргасан байна.

ABC News-ийн мэдээлснээр иргэдийн дээрх хүсэлт, өргөдөлтэй холбогдуулан АНУ-ын ерөнхийлөгч Барак Обама Техасын иргэдийн өргөдлийн талаар албан ёсны тайлбар өгөөгүй боловч Цагаан ордны шар айрагны жорын талаар асуусан иргэний асуултад Обама хариу өгсөн байсан гэнэ.