БНХАУ-ын Коммунист намын 18 дугаар их хурал өнөөдөр өндөрлөлөө. Нийслэл Бээжин хотноо долоо хоног үргэлжилсэн намын их хурлын сүүлийн өдөр ирэх таван жилд тус намыг удирдах ХКН-ын Төв хороо Хянан шалгах төв зөвлөлийн  гишүүдийг шинээр сонгов. Шинээр Ван Цишань, Лю Юньшань, Лю Яньдун, Ли Юаньчао, Ван Ян, Чан Гаоли, Чан Дэзян болон Юй Чэншэн нарын хүмүүс Төв хороонд сонгогджээ.

ХКН-ын 18 дахь удаагийн Төв хороо нь бүрэн эрхийнхээ хүрээнд маргааш болох анхны бүгд хуралдаанаар Улс төрийн товчоо, Улс төрийн товчооны байнгын хороо болоод намын ерөнхий нарийн бичгийн даргыг сонгох ажээ. Намын ерөнхий нарийн бичгээр сонгогдох эрхэм нь ирэх арван жилд Хятад хэмээх их гүрнийг удирдах учиртай. Түүнийг ирэх оны гуравдугаар сард болох БНХАУ-ын парламентийн их хурлаар Хятадын даргаар батламжлах билээ.