Шинэчлэлийн Засгийн га­зар өнгөрсөн бямба гаригт хийсэн ээл­жит хуралдаанаараа “Газ­рын тосны үнэ өснө хэмээн яаравчлан мэдээлэл хийж, зөвхөн картаар олгох зэргээр хязгаарлалт хийсэн газрын тосны бүтээгдэхүүний жи­жиг­лэнгийн худалдаа эрхлэгч зарим аж ахуйн нэгжид ха­риуцлага тооцох”-оор шийд­жээ. Засгийн газрын ху­ралдааны шийдвэрийн ту­хай ал­бан мэдээнээс хар­вал “Өрсөлдөөний хууль тогтоомж зөрч­сөн, газрын тосны бүтээгдэхүүний импорт, бөөний бо­лон жижиглэнгийн худалдаа эрхлэх тусгай зөвшөөрөл эзэмшигч компаниудад хуулийн дагуу хариуцлага тоо­цож ажиллахыг Шударга өрсөлдөөн, хэрэглэгчийн төлөө газрын дарга О.Магнайд даал­гав.

Зах зээл дээрх давамгай байдлаа урвуулан ашиглаж, газрын тосны бүтээгдэхүүний хомсдол үүсгэх, олон нийтэд буруу мэдээлэл өгөх замаар аж ахуйн нэгж, иргэд болон үндэсний эдийн засгийн аюулгүй байдалд хохирол учруулах санаатай үйлдэл гаргасан гэм буруутай этгээдүүдэд хуулийн хүрээнд хариуцлага тооцох ажлыг судлан, хэрэгжүүлэхийг Хууль зүйн сайд Х.Тэмүүжинд даал­галаа” гэсэн байгаа юм. Мөн “Газ­рын тосны бүтээгдэхүүний импорт, бөөний жижиглэнгийн худалдаа эрх­лэх тусгай зөвшөөрлийн нөх­цөл, шаардлагыг тодруулж, цаашид хууль, тогтоомж зөрчигчдөд хариуц­лага хүлээлгэх эрх зүйн орчныг боловсронгуй болгох талаар санал боловсруулж, Засгийн газрын ху­ралдаанд оруулахыг Уул уурхайн сайд Д.Ганхуяг, Хууль зүйн сайд Х.Тэмүүжин нарт даалгажээ” хэ­мээжээ.

Ийнхүү хамтарсан Засгийн газ­рын үед санасандаа хүрч, сарвайснаа авч байсан “НИК” гэгч “эрх” ком­панийг шинэчлэлийн Засгийн газрын Хууль, зүйн сайд Х.Тэмүүжин, Шу­дарга өрсөлдөөн, хэрэглэгчийн тө­лөө газрын дарга О.Магнай нар “хашраах” үүрэг авлаа. Үүний өмнө Шударга өрсөлдөөн, хэрэглэгчийн төлөө газрын дарга О.Магнай үгсэн хуйвалдаж үнээ нэмсэн нефть импорт­логчдоос хэрэглэгчдийг хохи­роосных нь төлөөсөнд 17 тэрбум төгрөг гаргуулж авах шийдвэрийг хэрэгжилтийг шалгаж “төрийн төмөр нүүр”-ийг харуулна гэдгээ амласан. Харин одоо Засгийн газар түүнд хамгийн том “акул”-аас нь эхлэн ха­риуцлага тооцох эрх мэдлийг ол­гов. Өөрөөр хэлбэл “хамтарсны гай”-аар хариуцлага нэхэж чадахгүй байсан галын цэг бүхэнд О.Магнай, Х.Тэмүүжин нарыг илгээгээд байх дүр зураг харагдаж байна. Энэ бол “Түүний гараар түүнийг бариулах” мэх.

Монголчууд цөөхүүлээ. Тав­хан үгэнд танигдаж төрөл садан, ну­таг усныхан болоод явчихдаг. Тий­­мээс хэнбугайн ч өмнөөс нүү­рээ “ширлэж” суугаад хуулийн заалт ярьж хариуцлага тооцох эр зо­­риг­той хөвгүүд хэрэгтэй байгаа юм. Нөгөөтэйгүүр О.Магнай, Х.Тэ­мүү­жин нарт өөр, өөрийн онцлог шинж бий. Тэр нь хэнд ч барьцаалагдаж яваагүй. Барьцаалагдах ч үгүй. Учир нь хэн ч тэдэнд тусалж байгаагүй. Ёстой л ширэнгэн ойн тэмцлээр өөрсдөө гарч ирсэн. Энэ хоёр залуугийн гарыг галд дүрснээрээ Засгийн газар үнэхээр шударга гэдгээ харуулж олон “эрх” компаниудтай хариуцлага тооцож чадна. “НИК”-ийн хувьд үеийн үед Засгийн газарт эрхэлж, нөгөөтэйгүүр ижил төрлийн бизнес эрхлэгчдээ уриалан монопольчлох оролдлого хийдэг. Яг ийм аргаар ноёрхлоо тогтоосон аж ахуйн нэгж “МСS”-ээс эхлээд олон бий. Одоо тэдний хэмжээлшгүй эрх мэдэлд төгсгөлийн цэг хатгахаар шинэчлэлийн Засгийн газар “шинэ, цэвэр” хүмүүсээ илгээж байна.

Энэ бол тайван замаар “дай­тах” зөв тактик. Гал руу гараа дүрэх эр зоригтой, хэнд ч барь­цаалагдахааргүй цэвэр ариун нэр хүндээр хуягласан төрийн сайд, эрх мэдэлтэн олшрох тусам “Эдийн засгийн алуурчид”, “Монгол син­дикатууд” сүйрч, Монголын эдийн засаг цэвэр өрсөлдөөний талбар болох учиртай. Үр дүнд нь иргэд хамгийн хямд, хамгийн чанартай бүтээгдэхүүнийг хэрэглэнэ. Аж ахуйн нэгжүүд бизнесийн салбарт улс төр дэх нөлөөллөөрөө бус цэ­вэр бүтээгдэхүүн, үйлчилгээний ча­на­раараа өрсөлдөх боломжтой болох юм. Тэгэхээр О.Магнай, Х.Тэм­жүүжин нарын гарыг “гал” руу дүрүүлье.