Ла лигийн 11 дүгээр тойргийн тоглолтын хүрээнд эзэн хааны “Реал Мадрид” баг “Леванте” багийн талбайд зочлон тоглолоо. Усархаг бороон дунд өрнөсөн хүнд хэцүү тулаанд 2:1-ийн харьцаагаар “Реал”-чууд ялалт байгуулсан байна. Тоглолтын эхний гоолыг эзэн хааны багийн хамгийн үнэтэй хөлбөмбөгч Криштиан Роналду 21 дэх минутад Анхель ди Мариягийн дамжуулалтаар гоолджээ. Үүнээс хойш “Реал” уулгалсан довтолгоон өрнүүлж байсан ч тэр бүр гоол болж чадахгүй байсаар эхний үе өндөрлөсөн байна. Харин хоёрдугаар үе талдаа орж байхад буюу 62 дахь минутад эзэн баг “Леванте”-гийн довтлогч Анхель гоолдсоноор тооны харьцааг 1:1 болгожээ. Харин 83 дахь минутад эхний гоолын эзэн Криштиан Рональдугаар сэлгэгдэн орж ирсэн залуу довтлогч Мората 84 дэх минутад гоолдсоноор эзэн хааны багт хожлын гурван оноог авчирсан байна. Одоогийн байдлаар Ла лигийг Каталоны нэр төр “Барселона” 31 оноогоор тэргүүлж байгаа бол Мадрид хотын өөр нэг баг “Атлетико” 28 оноотой удаалж байна. Харин өнгөрсөн шөнийн тоглолтод ялалт байгуулсан “Реал” 23 оноотой гуравдугаар байрт бичигдэж байгаа юм.