Хөвсгөл аймагт асуудлууд ар, араасаа хөвөрч эхэллээ. Тухайлбал, тус аймаг дахь Монгол үн­дэс­ний ард­чилсан намын гишүүд өнгөрсөн пү­рэв гарагаас эхлэн өлсгөлөн зарласан байна. Учир нь тус аймагт МҮАН-аас орон нутгийн хурлын сонгуульд нэр дэвшихээр бүртгүүлсэн го­ри­логчдын нэрийг сонгуулийн тойргийн хорооноос бүртгээгүй гэнэ. Тиймээс тэд энэ­хүү шийдвэрийг эсэргүүцэж нойтон өлсгөлөн зарласан юм байна. УИХ дахь Ардчилсан намын бүлгийн дарга Д.Эрдэнэбат Хөвсгөл аймагт томилолттой байгаа бөгөөд МҮАН-ын өлсгөлөн зарласан гишүүдтэй уулзсан байна. Тэрбээр МҮАН-ын гишүүдийн асуудлыг улстөржүүлэх ёсгүйг сануулаад Хөвсгөл аймгийн удирдлагуудад энэ асуудлыг хурдан шийдэхийг сануулсан байна. Энэ дагуу Хөвсгөл аймгийн сонгуулийн тойргийн хороо өчигдөр хуралджээ.

Хөвсгөл аймгийн сонгуулийн тойргийн хорооны гишүүн Я.Эрхэмбаяраас энэ талаар тодруулахад доорх товч хариултыг өгсөн юм.

-МҮАН-ын гишүүд өлсгө­лөн зарлаад хэд хонож байна. Тэр хүмүүсийг хэрхэх гэж байна вэ?

-Өлсгөлөн зогсох тийшээ хандсан.

-Тэгэхээр тэдний  шаард­лагыг хүлээж авахаар болсон гэсэн үг үү?

-Тэгж хэлж болно.

Тэрбээр “Үүнээс илүү мэ­дээлэл өгөх боломжгүй” гэсэн бөгөөд ямар­тай ч түүний өг­сөн мэдээллээр бол Хөвсгөл аймагт МҮАН-аас орон нут­гийн хурлын сон­гуульд нэр дэвшигчдийн нэрийг бүртгэж магадгүй юм байна.

Хурцдаад буй нөгөө асуу­дал нь тус аймгийн дизель түлшний нөөц багассанд байгаа гэнэ. “Аймгийн хэм­жээнд А80 автобензиний 20 гаруй хоногийн нөөц байна. Харин дизель түлшний хувьд нийт 16 тонн орчим л байгаа. Үүнийг зөвхөн албан хэрэгцээ, аймгийн онцгой байдлын хэлтсийн үйл ажиллагаанд ашиглаж байна. Үндсэндээ дизель түлшний нөөц дууссан” гэж аймгийн Засаг даргын орлогч М.Очирхуяг ярьжээ. Мөн сүүлийн хэдэн өдөр орсон цасны улмаас өвөлжилт хүндрэх хандлагатай болоод байгаа аж. Орон нутгийн сонгууль болох гэж буй энэ үед цас, зудын байдал хүндэрвэл иргэд саналаа өгөхөд хүндрэл учрахаар байгаа аж. Тиймээс аймгийн онцгой байдлын хэлтсээс хүч дайчлан зам, давааг нээх арга хэмжээ авч байгаа юм байна.