Өнөө цагийн шилдэг хөлбөмбөгч гэгдэх Лионель Мессигийн гоолын буухиа үргэлжилж, тэрээр нэг жилд 75 гоол оруулсан домогт Пелегийн амжилтыг эвдлээ. Испанийн Ла лигийн хүрээнд өнгөрсөн шөнө “Мальорка”-тай  хийсэн тоглолтод “Барселона” 4:2 харьцаатай хожсон бөгөөд Месси дубль хийснээр энэ жилийн хувьд 75, 76 дахь гоолоо оруулжээ. Ингэснээр Месси хөлбөмбөгийн түүхэнд нэг жилийн хугацаанд хамгийн олон оруулсан тоглогчдын жагсаалтын хоёрдугаарт бичигдэж байна. Одоо тэр он солигдохоос өмнө дахин 10 гоол оруулж чадвал Германы домогт хөлбөмбөгч Герд Мюллерийн түүхэн амжилтыг эвдэж, дэлхийн хаан спортын түүхэнд нэг жилийн хугацаанд хамгийн олон гоол оруулсан тоглогч болно. Мюллерийн хувьд 1972 онд “Байерн Мюнхен” болон Германы шигшээ багийн төлөө нийт 60 тоглолтод оролцож, 85 гоол оруулж байжээ.

Энэ сарын эхээр аав болсон Лионель Месси 2012 он гарсаар клубынхээ төлөө 64, шигшээ багийнхаа төлөө 12 гоол оруулжээ. Ингэхдээ 59 тоглолтод 76 гоол оруулсан амжилттай. Пелегийн хувьд 1958 онд 17 насандаа 53 тоглолтод 75 гоол оруулж байсан юм. Тухайн жил Бразилийн шигшээ баг түүхэндээ анх удаа дэлхийн аварга шалгаруулах тэмцээнд түрүүлсэн билээ. Харин 1974 оны дэлхийн аварга Германы шигшээ багийн тоглогч Мюллер 1972 онд баруун германчууд Европын аваргад түрүүлдэг жил Пелегийн амжилтыг эвджээ. Месси харин 2008 оны Бээжингийн олимпийн алтан медалийг эс тооцвол шигшээ багийнхаа хамт томоохон тэмцээнээс цом хүртээгүй.
 
Он солигдох мөч хүртэл Мессиг есөн тоглолт хүлээж байна, Ла лигийн зургаа, Аваргуудын лигийн хоёр, тэгээд Испанийн цомын тэмцээний хүрээнд нэг тоглолт.