Өнгөрч буй долоо хоногт Аваргуудын лигийн хэсгийн тоглолтын хүрээнд Норвегийн даруухан баг “Норшеллан” багийг 4:0 харьцаагаар хожоод байсан Италийн алдарт “Ювентус” баг Сери А-гийн 12 дугаар тойргийн тоглолтын хүрээнд “Пескара” багтай таарч 6:1-ийн харьцаагаар бут ниргэлээ. Тус тоглолтын эхний гоолыг тоглолтын зургаа дахь минутад Артуро Видал оруулсан бол 22 дахь минутад Фабио Куалиарела гоол оруулжээ. Энэ гоолоос ердөө гуравхан минутын дараа эзэн баг “Пескара”-гийн тоглогч Каскионе гоол оруулсан ч энэ нь эзэн багийн нэр төрийн л гоол байсан билээ. Удалгүй тоглолын 30 дахь минутад “Ювентус”-ын Асамоа гоол оруулж тоглолтын тооны харьцааг холдуулсан бөгөөд 38 дахь минутад Жиовинко гоолдож тооны харьцааг 4:1 болгосон юм. Эхний үеийн сүүлийн минутад Куалиарела дахин гоолдож өөрийнхөө хоёр дахь, багийнхаа тав дахь гоолыг оруулжээ. Хоёрдугаар хагас эхлээд төдийлөн удаагүй байхад буюу 53 дахь минутад Куалиарела дахин горуулж хет трик хийж, багийнхаа бут ниргэлтийг зургаа болгон нэмсэн юм. Үүнээс хойш тоглолтод ямар ч гоол оруулаагүй билээ. “Манай багийг дараа долоо хоногт тоглоход маш хэцүү баг хүлээж байгаа. “Лацио” бол хэцүү баг. Мөн хоёр долоо хоногийн дараа Аваргуудын лигийн ширүүн тоглолт хүлээж байна. Тиймээс бид энэ тоглолтод сэлгээнийхээ залуу тоглогчдыг гаргасан. Тэд ч итгэлийг минь алдсангүй. Цаашид бид фанатууддаа ийм тоглолтоор бэлэг барьсаар байх болно” гэж “Юве”-гийн дасгалжуулагч Ангело Алессио ярьжээ. Сери А-г одоогийн байдлаар “Ювентус” 31 оноотой тэргүүлж байна. Тэдний ард байгаа “Интер Милан” даваа гаригийн үдэш “Аталанта” багтай тоглох юм.